Bucks midaug vs Lakers

Mikulit na sab og daog ang undermanned nga Milwaukee Bucks dihang mibahug og 23 puntos si Drew Gooden aron pangulohan ang iyang team ngadto sa 100-89 nga kadaugan batok sa Los Angeles Lakers kinsa nasukamod na sab sa ilang road trip kagahapon sa nagpadayong NBA regular season didto sa Bradley Center sa Milwaukee, Wisconsin.     Si Kobe Bryant maoy nangu sa Lakers kinsa naghupot na'g 1-7 nga baraha sa ilang road games karon nga season.

Silang Ersan Ilyasova ug Mike Dunleavy parehong mibahug og 15 puntos alang sa Bucks kinsa nakahimo gihapon pagdaug bisan ug wala ang duha nila ka star players nga sila si Andrew Bogut ug Stephen Jackson.

Wala makaduwa alang sa Bucks si Bogut kinsa adunay piang samtang si Jackson gisuspenso og usa ka duwa sa NBA human sila mapilde didto sa Chicago, 100-107 niadtong Sabado.

Nabuak ni Bryant ang franchise record ni Jerry West human sa iyang unom ka free throws nga 7,160.

Hapit na sab mahimong career leader si Bryant sa Lakers sa field goals made diin biya na lang siya'g 13 ka field goals aron tablahon si Kareem Abdul-Jabbar kinsa maoy naghupot sa franchise record nga 9,935 field goals made.

Bisan og wala silang Bogut ug Jackson, nakahimo gihapon pagkontrolar sa duwa ang Bucks kinsa misandig kang Ilyasova sa mga puntos gikan sa poste.

Mi-iskor si Luc Richard Mbaha Moute og jumpshot ug dayon mi-iskor sab si Gooden pinaagi sa usa ka turnaround hook shot ug mi-iskor sab og duha ka free throws aron inaton ang ilang labaw ngadto sa 91-81.

Human moiskor si Bryant og duha ka free throws, mibawos si Dunleavy og three-pointer aron paglawig ngadto sa kadaugan dihang may 1:24 na lang ang nahibiling oras og sila gihapon ang naglabaw.

Gisuspenso si Jackson sa NBA tungod sa verbal abuse ngadto sa referee ug nagdumili sa pagbiya sa korte sa tinarung nga paagi human sila mapilde sa Bulls. Lain na sab kining pait nga kahimtang ni Jackson kinsa gibangko ni coach Scott Skiles atol sa duwa sa Bucks niadtong Enero 20 didto sa New York.

Napiang ang wala nga tikod ni Bogut sa miaging Miyerkules atol sa ilang duwa didto sa Houston ug hayan dili makabalik og duwa sulod sa walo ngadto sa 12 ka semana.  (NBA.com)