CEBU, Philippines - Suwayan sa Sacred Heart School-Ateneo de Cebu pagdepensa sa ilang korona sa national Passerelle championship sa ilang pagsalmot sa national finals sa Milo-backed BEST SBP/Passerelle Twin Tournament 2011 sugod karong adlawa didto sa Xavier School Gym sa San Juan, Metro Manila.
Ang Magis Eagles midaog na og lima ka higayon isip Passerelle champion dinhi sa Sugbo ug upat na ka higayon nga midaog sa Visayas Regional championship.
Nagtinguha kini og back-to-back titles sa Under-15 age bracket.
Ang mohatag og kalig-on sa Magis Eagles mao ang Under 15 players nga sila si Dawn Hynric Ochea, Rendell Senining, Dave Yu, Bro Catan, Laeil Medalle, Miguel Competente ug Jarek Mercado. Mosuporta sab ang mas batan-ong mga players nga sila si Jari Igna, 14-anyos ug ang 13-anyos nga si Janjan Jaboneta.
Ang Passerelle division pagalangkuban kini'g pito ka players nga Under-15, unom ka Under-14 players ug duha ka Under-13 players. Tinguha sa Magis Eagles nga mobawi didto sa Manila human sila mapilde sa ilang kampanya sa juniors division sa 11th Cebu Schools Athletic Foundation, Inc. (CESAFI) atol sa ilang best-of-five championship series batok sa University of the Visayas (UV) Baby Lancers.
Sa Small Basketeers division, ang St. John’s Institute of Bacolod maoy morepresentar sa Visayas ug mag-agi kini'g kalisud batok sa Lourdes School of Mandaluyong kinsa maoy nagpalagpot sa four-peat SBP national champions Ateneo de Manila. (BANAT SPORTS)