Muaña nagmangtas, Codilla misurender

CEBU, Philippines - Wala moila og kauban si Mardie Muaña sa University of the Visayas (UV) ug giunay niya pagpilde si Dann Lou Codilla pinaagi sa pagpaundang sud lang sa unang round sa Summit Natural Drinking Water’s Amateur Fight Series sa miaging gabii didto sa Gaisano Countrymall carpark.

Nagpauwan si Muaña og nagpungasi nga mga suntok ngadto sa ulo ug lawas ni Codilla aron pasurenderon kini sa nahabiling 1:47 segundos sa first round ubos sa 56 kgs.

Laing UV boxer nga si Ariel Sibay midaog sab pinaagi sa desisyon batok ni Raul Tarona sa Phil-Australia Boxing Club.

Nangapusoy usab ang mga teammates ni Tarona nga sila si Vic Sitto ug Axel Torbiso batok nila ni Melvin Lulu sa Sultan Kudarat ug Ritchie Montealto sa Consolacion.

Tulo ka pambato sa Cabancalan nga sila si JK Malupay, Bryan Paden ug Polid Banal ang mikulit sab og daog sa tagsa-tagsa nilang duwa.

Mikompleto sa lista sa mga winners mao sila si Rebel Reyes, Rolando Lingao-Lingao, Richard Barrios ug Kevin Jake Catajara.  (BANAT SPORTS)