CEBU, Philippines - Panimalos maoy tuyo ni kanhi WBO super flyweight champion Marvin 'Marvelous' Sonsona sa iyang pakigsangka ni Mexican knockout artist Carlos 'El Relampago' Jacobo karong gabii didto sa Hoops Dome sa Lapu-Lapu City.
Si Sonsona, kinsa dugay nga nawagtang sa eksena sa boksing human sa iyang fourth round knockout nga kapildihan batok ni Puerto Rican champion Wilfredo Vazquez, Jr. niadtong Pebrero sa miaging tuig, naglaraw nga banhawon ang iyang ngalan isip usa sa mga world champion sa nasud.
Atol sa press conference kagahapon didto sa J Centre Mall sa A.S. Fortuna St. sa Mandaue City, gipadayag ni Sonsona ang iyang kaandam sa pakigbatok ni Jacobo.
Ang 21-anyos nga si Sonsona mapasalamaton labaw na ngadto sa iyang promoter nga si Sammy Gello-ani, kinsa misalig gihapon kaniya bisan pa sa mga kahiwian nga iyang nabuhat kaniadto.
"Andam na ko nga mobalik," matud pa niya. "Pasalamat kaayo ko ni Sir Sammy sa iyang gihatag nako nga chance ug akong paningkamotan aron makahatag ko og nindot nga performance."
Apan dili sayon ang hagit nga giatubang ni Sonsona (14-1, 12KOs) tungod kay sangkaon niya ang reigning WBC Fecombox bantamweight titlist nga adunay record nga 16-3, 13KOs.
"Now we will see if Marvin is mature enough to continue his quest for greatness and to see if his really back, he got to fight a quality opponent," matud pa ni Gello-ani.
Misaad si Gello-ani nga hatagan pa og laing dakung away si Sonsona kun modaog kini sa iyang away karong gabii.
"I can always get a big fight for him, so it all depends on him and his performance in this fight," dugang pa niya.
Sa supporting bouts, si ex-WBO interim light flyweight champion Johnriel Casimero makigsinukliay og kumo batok ni Roemart 'TI Yamagata' Sentillas, samtang si Jessie Albaracin sa Davao manalipod sa iyang WBO Oriental super bantamweight belt batok sa Sugbuanong si Marvin Tampus Singwancha. (BANATSPORTS)