CEBU, Philippines - Parehong mikulit og daog ang RDAK/EDCON ug ang KIA Motors batok sa managlahing kaatbang aron moabante sa semifinals sa Sacred Heart Ateneo Alumni Basketball Athletic Association (SHAABAA) 2011 Cebu Landmaster’s Cup didto sa Sacred Heart gym sa Gen. Maxilom Ave., ning siyudad.
Gibaraw sa RDAK ang running game sa JAPFA/Kiki’s Catering aron mo-iskor og makabungog nga daog, 71-50, samtang ang KIA Motors mipukan sa Kunstof sa iskor nga 67-54.
Silang PJ Sykimte, James Lawrence Edquilla ug Robert Gilo nagtambayayong aron masumpo ang running game sa JAFPA. Ila sab napugngan ang leading scorer sa JAFPA nga si Ed Macasling, kinsa igo lang nakahimo og nuybe puntos.
Si Sykimte mibahog og 13 puntos, si Edquilla midugang og 12 puntos, samtang si Gilo, ang kanhi sentro sa USC Warriors ug commercial veteran, mitampo og 11 puntos.
Ang natagak nga JAPFA gipangulohan ni Brian Downey, kinsa mihakot og 14 puntos, gisundan ni Kylle Valmoria nga adunay 11 puntos.
Sa laing bahin, ang multiple MVP awardee sa SHAABAA nga si Dave Lim mipakita sa iyang katakus aron pangulohan ang KIA Motors pinaagi sa iyang 19 puntos. (BANATSPORTS)