CEBU, Philippines - Ang back-to-back champions Southwestern University (SWU) Lady Cobras ug ang ilang batan-ong counterpart mipukan sa ilang tagsa-tagsa ka kaatbang sa pagsugod sa Cebu Schools Athletic Foundation Inc (CESAFI) women's volleyball tournament kagahapon didto sa Aznar Coliseum.
Mipahungaw dayon sa ilang kainit ang SWU ni coach Jordan Paca aron pagpukan sa Cebu Doctors' University (CDU) Lady Stallions, 25-15 kortesiya nilang Raphril Aguilar, Lorie May Layno, Fritzie Aligway, Danika Gendrauli, Princess Anne Pido ug six-footer gikan sa Dumanjug nga si Marlyn Llagoso.
Nakuratan ang Lady Cobras sa second set dihang ang Lady Stallions ni coach Fr. Rey T. Manayon miabante og kuwatro puntos, 16-12 pinaagi sa walay puas nga pangataki nilang Athena Sucalit, Catherine Marquez ug Marjorie Coloscos.Apan si Aguilar mipakita sa iyang kabangis diin mihimo kini'g 3-0 run aron pakubsan ang labaw, 15-16. Katapusang nakalabaw ang CDU sa iskor nga 20-18 kay sila si Gendrauli, Pido ug Aguilar wala na magpapugong sa ilang opensa aron maangkon ang momentum, 21-20. Sukad niadto, ang SWU wala na motugot sa CDU nga modominar pag-usab hangtod nga natapos ang duwa sa iskor nga 25-23.
Sa secondary division, ang SWU girls team nangayo pa og tulo ka set una nila gipilde ang University of San Carlos (USC) Lady Warriors, 15-25, 25-20, 25-22. (BANAT NEWS)