Derrick Rose maglalaro sa Ultimate All-Star Weekend

MANILA, Philippines - Si reigning NBA MVP at dating Rookie of the Year Derrick Rose ng Chicago Bulls ang magiging pang walo at huling miyembro ng NBA All-Stars na lalaro laban sa Smart Gilas Pilipinas at isang PBA selection sa isang two-game series sa Hulyo 23 at 24 sa Araneta Coliseum.

Ang Ultimate All-Star Weekend ay tatampukan nina Rose, five-time champions Kobe Bryant at Derek Fisher ng Los Angeles La­kers at dating ROY awardee Chris Paul ng New Orleans Hornets.

Sa kanyang tatlong NBA season, nakuha ni Rose ang ROY at ang NBA Eastern Conference championship para sa Bulls.

Natalo ang Chicago sa Miami Heat sa semifinal round.

Maliban kina Bryant, Fi­sher, Rose at Paul, ang iba pang miyembro ng NBA squad ay sina guard Tyreke Evans ng Sacramento Kings, James Har­den ng Oklahoma Thunder, DeAndre Jordan ng Los Angeles Clippers at Derrick Williams ng Minnesota Timberwolves.

Hindi naman sumama si reigning ROY at slam dunk champion Blake Griffin ng Los Angeles Clippers dahil sa kasal ng kanyang kapatid sa United States.

Bumagsak naman ang negosasyon sa pagitan ng MVP Foundation at ng kampo ni two-time scoring champion Kevin Durant ng Oklahoma City Thunder.

Haharapin ng NBA team, gagabayan ni Kobe bi­lang coach, ang PBA se­lection ni Chot Reyes sa Hulyo 23 sa ganap na alas-7 ng gabi sa Big Dome.

Makakatapat ng mga NBA stars ang Smart Gilas kinabukasan sa ganap na ala-1 ng hapon.

Sina James Yap at Marc Pingris ng B-Meg, Mark Caguioa at JC Intal ng Ginebra, Arwin Santos at Rabeh Al-Hussaini ng Petron Blaze, Ryan Reyes, Jason Castro at Larry Fona­cier ng Talk N’ Text, Sonny Thoss at LA Tenorio ng Alaska, Sol Mercado ng Meralco, Gary David ng Powerade, Gabe Norwood ng Rain or Shine at Danny Seigle ng Air21 ang bubuo sa PBA team.

Maglalaro naman sina Kelly Williams, Jimmy Alapag at Ranidel de Ocampo sa Smart Gilas kasama sina Asi Taulava ng Me­ralco at Dondon Hontiveros ng Air21.