MLB legend ania karon sa Sugbu

CEBU, Philippines - Ania karon sa Sugbu ang Major League Baseball legend nga si Ken Griffey Jr. aron mopahigayon og duha ka adlaw nga clinics sugod karong hapon diha sa Aboitiz Sports Field sa barangay Subangdaku, Mandaue City.

Uban ni Griffey, 41-anyos mao ang iyang igsuon nga si Craig, usa ka kanhi magduduwa sa Seattle Mariners organization ug Joe Logan, kanhi player sa Montreal Expos organization.

Si Griffey nalakip sa All-Star sud sa 13 ka higayon, Golden Glove awardee sa 10 ka sunod-sunod nga higayon, kanhi American League MVP ug usa sa mga elite group sa mga players nga nakahimo'g daghang homeruns nga naglakip ni Barry Bons, Hank Aaron ug Babe Ruth.

Si Griffey miretiro human sa 21 ka seasons diin niduwa siya uban sa Seattle Mariners, Cincinati Reds ug Chicago White Sox.

Ang clinics alang sa coaches mopokus sa pagtudlo og basics sa teamwork ug sportsmanship, pag-ila ug pagpalambo og talento ug mangu sa practice ug clinics. Ang developing fundamental baseball skills sama sa hitting, infield, pitching ug outfield maoy ipahaom sa clinics alang sa players.

Adunay tulo ka clinics nga sugdan sa 6-9 years old age group karong adlawa sa alas-4 sa hapon hangtod sa alas-6 sa gabii. 

Inig ka ugma, mao ang 10-16 age group sa alas-8:30 hangtod sa alas-11:30 sa buntag ug ang 16-above age group gikan sa alas-1:30 hangtod sa alas-4 sa hapon.

Giawhag ang tanang baseball, softball ug sports aficionados sa pagtan-aw ug pagkat-on sa bag-ong mga teknik sa duwang baseball.