MANILA, Philippines - Naging agresibo ang Letran Squires sa third period upang igupo ang Jose Rizal Light Bombers, 87-73, sa junior’s division ng 86th NCAA basketball tournament kahapon sa San Juan Gym.
Umiskor si Mark Cruz ng game-high 25 points mula sa kanyang 10-of-16 fieldgoal shooting bukod pa ang 6 assists, 4 rebounds at 1 steal upang pangunahan ang Squires.
Itinakda ng Squires ang kanilang paghaharap ng St. Benilde Junior Blazers sa Lunes sa isa pang knockout game na magdedetermina kung sino sa kanila ang aangkin sa pang apat at huling tiket sa Final Four.
Ang mananaig sa pagitan ng Squires at Junior Blazers ang tatayo bilang No. 4 sa Final Four kalaban ang No. 1 at nagdedepensang San Beda Red Cubs.
Maghaharap naman ang No. 2 San Sebastian Staglets at No. 3 Perpetual Junior Altas.