MANILA, Philippines - Binuksan ni Filipino cue master Dennis “Robocop” Orcollo ang kanyang kampanya sa 2010 World Pool-Billiard Association (WPA) 9-Ball Championship matapos igupo si German Ralf “Kaiser” Souquet, 9-6, kahapon sa Qatar Billiards and Snooker Federation hall sa Doha, Qatar.
“Maganda ‘yung naging simula, medyo umayon sa akin ‘yung bola kaya sinamantala ko na,” wika ni Orcollo, nagmula sa pagkakampeon sa nakaraang World Pool Masters, sa kanyang tagumpay kay Souquet, ang WPA 8-Ball at 9-Ball champion.
Bukod kay Orcollo, ang iba pang sumargo ng panalo sa nasabing group stage matches ay sina Francisco “Django” Bustamante at Lee Van “The Slayer” Corteza.
Binigo ni Bustamante si Italian Fabio Petroni, 9-7, habang pinayukod naman ni Corteza si Qatari Ibrahim Al Khadar, 9-1.
Hindi naman naging masuwerte sina Spanish Open champion Efren “Bata” Reyes, Jeffrey “The Bull” de Luna at Marlon “Marvelous” Manalo matapos matalo sa kani-kanilang laro.
Ginitla ni Liu Haitao ng China si Reyes, 9-5; napahiya si De Luna kay Thai Nitiwat Kanjanasri, 9-6; at ginulat ni dating RP snooker teammate Joven Alba si Manalo, 9-8.
Ang iba pang nagtala ng mga panalo ay sina Raymond Faraon, Oliver Medenilla, Allan Cuartero at Israel “Amay” Rota.
Pinatid ni Faraon si Mark Gray ng Great Britain, 9-2; giniba ni Medenilla si Jeong Young Hwa ng Korea, 9-6; tinagpas ni Cuartero si Chan Keng Kwang ng Singapore, 9-7; at ginulantang ni Rota si World 9-ball champion Daryl Peach ng Great Britain, 9-8.
Sa iba pang mga nakatakdang laban, haharapin ni Antonio “Nickoy” Lining si American Corey Deuel; lalabanan ni Antonio “Ga-Ga” Gabica si German Nicolas Otterman; makakasagupa ni Ronnie “Volcano” Alcano si Qatari Ahmed Hassan at kakatagpuin ni Francisco Felicilda si Indian Muhammad Zulfikri.