Mexican TKO kay Gesta, kampeon sa WBO Youth
MANILA, Philippines - Lumapit sa isang hakbang si Mercito Gesta sa hangaring maging world champion nang kunin ang bakanteng WBO NABO Youth light weight title na pinaglabanan nila ni Mexican Oscar Meza nitong Biyernes sa A La Carte Event Pavillon sa Tampa, Florida, USA.
Ang 22 anyos na tubong Mandaue City, Cebu pero naninirahan na sa San Diego, California ay muling ipinamalas ang bangis ng mga kamao para pasukuin si Meza sa pagsisimula ng ikalimang round.
Ininda ng 23-anyos na si Meza ang matitinding suntok sa katawan at bodega upang magdesisyon na huwag ng tumayo sa kinauupuan sa puntong magsisimula na ang ikalimang round.
Unang pagkakataon na lumaban si Gesta sa titulo pero mataas ang paniniwala itong mananalo lalo nga’t hindi pa siya natatalo sa 17 naunang laban.
Ang tanging mantsa sa kanyang karta ay ang tabla nila ni Rey Llagas noong 2005 nang maputukan si Gesta sa kilay sa round two upang mauwi sa technical draw ang sagupaan na ginawa sa San Andres Sports Complex.
“Gaya ng lahat ng mga boksingero, nangangarap din ako na maging world champion sa hinaharap at ang panalo kong ito ay tungtungan ko para maisakatuparan ang pangarap na ito,” wika ni Gesta na ngayon ay may 18-0 panalo-talo karta at 8 KO.
Si Meza naman ay nalaglag sa 19-4 karta sa 23 laban at nalaglag din sa 0-2 karta sa dalawang laban na ginawa sa US.
Unang lumaban si Meza, tubong Sinaola, Mexico, sa US noong Mayo 16, 2009 at natalo siya sa pamamagitan ng TKO sa fifth round laban kay Brandon Rios.
- Latest
- Trending