Managsuong Siso mag-unay sa finals

CEBU, Philippines - Managsuon sa dugo, apan kontra sa duwa tungod kay si Sally Mae ug Sallydine subling magsangka sa final sa girls' 18 sa 15th Gullas Tennis Cup karong adlawa diha sa Cebu Country Club tennis court.

Lab-as pa sa panumdoman, si Sally Mae buot manimalos sa iyang kapildihan ngadto sa iyang maguwang nga si Sallydine sa ilang panag-abot sa championship round didto sa Dumaguete dili pa dugay.

Dili sayon ang kumbati sa managsuong Siso human si Sallydine gustong mopamatuod nga dili taghap ang iyang kadaugan batok sa iyang manghod nga si Sally Mae.

Si Sally Mae nakadagit og pasaporte sa final human iyang gipalayas si Kristel Mae Buenacosa, 6-1, 6-2, samtang si Sallydine nidaog pinaagi

sa default batok ni Elma Dasian.

Gawas sa girls' 18, si Sally Mae gikatakda sab nga moduwa sa girls' 16 final batok ni Krissiane Kintanar. Si Sally Mae misiro ni Khyle Longakit, 6-0,6-0 ug si Kintanar mipatigbabaw batok ni Christine Belleta, 6-3, 6-0.

Sama ni Sally Mae, si Kintanar nakasulod sab sa finals duha ka higayon dihang iyang gipukan ang lain niyang duwa sa semifinal batok ni Francis Lorein Lanzado, 6-1, 6-1 sa boys' 14.

Sa laing bahin, si Niño Siso, miabante sab sa final round sa boys' 18 class. Iyang sangkaon si Israel Abarquez alang sa ilang "rematch." 

Si Niño mipilde ni Fritz Satera, 6-1, 6-1, samtang si Abarquez mipukan ni Amiel Aya-ay, 6-3, 6-3 aron maangkon ang duha ka luna sa finals.   (FREEMAN NEWS)