CEBU, Philippines - Yano kaayong nakasud si Sally Mae Siso sa girls 18-under finals sa 1st Palawan Pawnshop Express Padala National Junior Tennis Circuit-Cebu leg kagahapon didto sa Cebu Country Club.
Si Siso mipukan ni Kristel Mae Buenacosa, 6-2, 6-1 aron moduwa sa kampiyonato batok ni Elma Dasian, kinsa miabante sab sa finals human midaog pinaagi sa default batok ni Claire Lazaga, kinsa wala mopatim-aw sa ilang duwa sa semifinal.
Sa laing bahin, sila si Alexie Santos, Zeth Mae Alferez, Christopher Encarnacion ug Joshua Kinaadman miabante sa final round sa ilang tagsa-tagsa ka dibisyon.
Si Santos mipulbos ni Rey Dante Toledo, 6-1, 6-0 aron pag-abante sa final batok ni Alferez sa unisex 10-under.
Gipilde sab ni Alferez si Kara Salimbangon, 6-1, 6-0 aron makaangkon og katungod sa pakigharong ni Kinaadman sa boys 12-under finals.
Si Encarnacion mibuntog ni Godfrey Seno, 6-2, 6-0, samtang si Kinaadman mipukan ni Mark Go, 6-2, 6-1. – BANAT NEWS