Losiaboi, Delos Santos nanghawod sa tagsa-tagsa nila ka dibisyon sa Citi-Run

CEBU, Philippines - Nibalik na si Kenyan missionary Simon Losiaboi sa paghari sa karsada, samtang si Mary Grace delos Santos mipakita sab sa iyang kainit sa Citi Run niadtong Domingo didto sa Waterfront Cebu City Hotel and Casino grounds sa Lahug, ning siyudad.

Gipahimuslan ni Losiaboi ang kahigayonan sa wala pag-apil sa higpit niyang kaatbang nga si Mendel Lopez aron masakmit ang titulo sa 12K men’s open nga mi-oras og 39:15.01.

Si Losiaboi nakatagamtam sa iyang sunod-sunod nga kapildihan niadtong miaging semana diin naunhan siya ni Lopez sa makaduha ka higayon sa managlahing lumba.

Si Losiaboi gisundan ni Jobert Carolino, kinsa mitapos sa lumba sud sa 40:39.50, samtang si Reprinel Banzon maoy mipahiluna sa ikatulong dapit sa oras nga 40:48.50.

Sa pikas bahin, higpit usab ang panagribal sa duha sa giilang labing paspas nga female runners dinhi sa Sugbu nga sila si Delos Santos ug Sugbuanang si Madelyn Carter.

Sa maong lumba, si Delos Santos mao ang mipatigbabaw sa oras nga 45:37.15, samtang si Carter mi-oras og 49:27.63. Si Joeyry Lee nalagpot sa ikatulo sa oras nga 52:56.95.

Sa laing bahin, sila si Joel Delposo ug Mary Joy Tabal mao ang gibayaw isip hari ug reyna sa 6K division.

Si Delposo, kinsa mitapos sa dagan sa oras nga 21:02.27 maoy misakmit sa titulo sa men’s open uban sa iyang runner-ups -- Roland Montebon (21:22.950) ug Ruth Banzon (24:25.120).

Ang top three finishers sa women's open mao sila si Tabal (24:18.13), Aiza Suwaybaguio (26:21.06) ug Marlyn Alin (27:33.83). (BANATNEWS)