5 ka tennis events molamas sa Mandaue City Fiesta 2010

CEBU, Philippines - Lima ka managlahing tennis competitions ang gihanan-ay ning tuiga sa Mayor Jonas C. Cortes Cup Tennis Tournament diha sa Mandaue City Tennis Club (MCTC) courts.

Sugdan kini karong Marso 27 pinaagi sa veterans competition nga alang lamang niadtong miyembro sa MCTC.

Sundan kini sa special event karong Abril 7-8. Sa Abril 22-25 himuon ang Inter-Club Invitational Tennis Tournament ug sundan kini sa Men's Open sa Abril 27 hangtod sa Mayo 2.

Ang sunod-sunod nga kompetisyon sa tennis nga tapuson sa Junior Open karong Mayo 3-7, maoy usa sa mga highlights sa tinuig nga kapistahan sa Mandaue pasidungog sa ilang mahal nga patron St. Joseph the Worker, karong Mayo 8.

Gipasiugdahan kini sa Mandaue City Sports Commission pinaagi sa ilang executive director Atty. Hidelito S. Pascual.

Ang mga directors mao sila si Jun Saberon sa men’s open, Jun Teves sa Junior’s Open, Jefren Signe sa Inter-Club Invitational ug Noe Abella alang sa veterans. Si Engr. Jerome A. Peralta maoy overall Chairman sa abag ni Manuel Valdueza.

Gawas sa mga tropeyo, ganting salapi nga P150,000 ang giandam alang sa tanang mga mananaog.

Alang sa dugang mga kasayoran, mahimong mokontak ni Eugene Ruiz (343-8056), Jun Saberon (0906-5024399), Jun Teves (0921-545145), Jefren 'Bata' Signe (238-9766) ug Manuel 'Noe' Abella (0920-6029121). – BANAT NEWS