2 Pinoy undercard sa laban ni Pacquiao

MANILA, Philippines - Dalawang Filipino boxer ang itatampok sa undercard ng “The Event” nina Manny Pacquiao at Joshua Clottey bukas sa Cowboys Stadium sa Arlington, Texas.

Ang mga ito ay sina fea­therweight Michael Farenas at bantamweight Eden Sonsona, nakatatandang kapatid ni dating world super flyweight king ‘Marvelous’ Marvin Sonsona.

Makakatapat ni Farenas, nagdadala ng 26-2-3 win-loss draw ring record kasama ang 23 KOs, si Joe Morales (20-13-0, 4 KOs) para sa isang eight-round bout.

Sasagupain naman ni Sonsona (18-5-0, 5 KOs) si dating bantamweight champion Mauricio Pastrana (35-12-2, 24 KOs) sa isa ring eight-round fight.

Ang 25-anyos na si Fa­re­nas ay ang kasaluku­yang World Professional Boxing Federation (WPBF) featherweight titlist matapos talunin si Sathian Sokham via first-round KO noong Enero 8 sa Mandaluyong City Gymnasium. (RC)