Power 40 kampiyon sa 1st CGBL season

CEBU, Philippines - Mibugha og 19 puntos lakip ang lima ka three-pointers ang kanhi UV Lancer nga si Stevenson Dajalos aron pangulohan ang Power Selection ni team manager Atty. Flor Yosores ngadto sa 94-77 nga kadaogan batok sa mibisitang Minglanilla Basketball Association (MIBA) ug sakmiton ang korona sa Cebu Golden Basketball League (CGBL) inaugural season didto sa Inayawan Sports Complex.

Ang kanhi CIT Wildcat nga si Titing dela Torre mibahug sab og 19 puntos uban sa lima ka triples aron pangulohan ang MIBA ug ang duha ka shooters sa matag habig nagpunay og itsa sa gawas diin daw sa nagpahigayon sila’g shooting contest ilabi na sa uwahing bahin sa fourth period.

Walay nakapiog ni Cesar Ortega sa ilawom ug iyang gidominar ang undergoal pinaagi sa pag-iskor og 16 puntos. Sayong nanginit ang Power Forty Selection human lang sa duha ka three-pointers ni Jingjing Gacayan ug kalit nilang gibiyaan ang MIBA sa second period dihang nagpuli-puli og isjor sila si Monching Ceballos ug Gilbert Gajudo kinsa mi-iskor og 8-0 run ug molabaw og 46-35 sa halftime.

Ang Power Forty Selection naglabaw na og 15 puntos human sa third quarter, 70-55 ug wala na nila hatagi og laing higayon nga mosikit pag-usab ang MIBA. Dili lang sila si Dajalos ug Ortega maoy nag-igo alang sa Power Forty apan hasta sab sila si Michael Arias ug Ceballos kinsa parehong miposa og 12 puntos, si Gacayan midugang ug 11 puntos ug si Gajudo mi-iskor og 10 puntos. .

Si Yosores kinsa igo lang miduwa ug pipila lang ka gutlo dihang gipasulod siya ni coach Romy Rama sa fourth period, mihimo lang og usa ka attempt gikan sa three-point area apan nakahimo siya’g tulo ka assists ngadto kang Arias, Gajudo ug Ortega. Iyang gisaaran ang mga players ngadto sa usa ka victory party sunod Sabado didto sa iyang pinuy-anan sa Tayud, Consolacion diin adunay ipahigayon nga eleksiyon sa mga bag-ong opisyales sa Power Forty ug paghatag ug pasidungog sa MVP ug sa Mythical Five sa CGBL.

Misaad sab si Yosores nga ihatag ang 15 mil nga premyo karong Sabado.

Si Peter Vasquez maoy nagsunod kang Dela Torre sa iyang 15 puntos alang sa MIBA.

Sa unang duwa, midaog ang Better Run Basketball Association (BRBA) pinaagi sa usa ka foreiture batok sa Los Amigos Basketball Association (LABA) aron pag-angkon sa ikatulong pwesto.

Puntos matag usa:

Power Forty (94)— Dajalos 19, Ortega 16, Arias 12, Ceballos 12, Gacayan 11, Gajudo 10, Dela rama 5, Bugao 5, Vernaiz 2

MIBA (77)— Dela Torre 19, Vasquez 15, Tan 10, Fuentes 8, Rivera 8, Cadiz 7, Canada 6, Cabradilla 2, Medalle 2.

Halftime: 46-35. - Gabby G. Malagar (BANAT NEWS)