CEBU, Philippines - Maghugop na usab ang mga banggiitang tennis players dinhi sa Sugbu alang sa laing hugna sa Skygo Friendship Cup karong Pebrero 22-28 diha sa La Paloma Tennis Club sa Brgy. Tisa, ning siyudad.
Gipasiugdahan ni businessman Mario King, ang unom ka adlaw nga torneyo usa ka inter-club doubles competition ug gibuak ngadto sa class A ug B, diin 16 ka entries ang mosalmot matag dibisyon.
Mokabat ngadto sa P36,000 nga ganting salapi ang giandam alang sa mga mananaog.
Atol sa awarding ceremony, adunay usa ka brand new Skygo Royale 110 motorcycle nga i-raffle.
Ang maong torneyo nga gihimo agi'g pagtamod sa Charter Day celebration sa siyudad sa Sugbu gisuportahan usab nila ni Engr. Lito Valenzona, Engr. Mike Balazo, Titing Sayson, Joel Cortes ug Engr. Lanny Orozco uban sa abag ni Atan Guardo, PAGCOR-Cebu, Dendramil Merchandise, San Miguel Beer, Chris Sports ug Nature’s Spring.
Aduna kini registration fee nga P600 matag paresan. Alang sa dugang mga kasayoran, mahimong motawag sa 261-3103. – BANAT NEWS