GUV Cup quarterfinals banatan karon

CEBU, Philippines - Kulbahinam nga aksiyon sa volleyball ang moulbo karon pinaagi sa pagpahigayon sa municipal cluster quarterfinals sa 5th Governor Gwen Garcia Unity Volleyball (GUV) Cup diha sa Cebu International Convention Center (CICC) grounds sa Mandaue City.

Sa unang duwa sa alas-8 sa buntag, ang defending champion Catmon ni coach Vilma Veloso modepensa sa ilang korona batok sa Cluster I titlest Minglanilla.

Ang Catmon bitoonan nilang Palarong Pambansa medallists Methosheena Bate, Athena Sucalit, Catherine Marquez, Lanie Silvestre, Jerymie Montalvo, Gretchel Soltones ug Cristy Sucalit.

Sa ikaduhang duwa, ang Liloan makigsangka batok sa Sta. Fe, samtang ang ubang mga duwa sa women's division mao ang Compostela batok Boljoon, Badian batok Barili ug Daanbantayan batok Dalaguete.

Sa men's division, ang Liloan ni coach Ondo Mosqueda makigtigi batok sa Dumanjug.

Ang Liloan pangulohan ni RP team member Jonrey Sasing ug former USPF stalwarts Angellan Viso, Clifford Cafe, Maynard Alejandrino ug James Ryan Rivera.

Ang inilog nga Minglanilla, moharong sab batok sa Barili alang sa ikaduhang duwa. Ang Daanbantayan mobatok sa Moalboal ug ang Sta. Fe makigsambunot batok sa Catmon.

Ang nag-unang upat ka teams sa matag bracket moabante ngadto sa semifinals sunod Sabado uban sa semifinalists sa city cluster nga mao ang Mandaue ug Talisay sa women ug men's division.

Sa women's class, ang Mandaue moharong sa Carcar, samtang ang Talisay moharong sab batok sa Danao. Sa men's division, ang Talisay makigsangka batok sa Carcar, samtang ang Mandaue moharong sa Toledo.

Ang championship sa city ug municipal cluster himuon karong Disyembre 20 diha gihapon sa CICC. – BANAT NEWS