CEBU, Philippines - Ang Yaw-Yan ArDigma Martial Arts Federation Inc. ubos sa liderato ni Master Benigno 'Ekin' R. Caniga Jr., mibalhin og bag-ong lugar nga mas daku ug hamugaway alang sa ilang mga tinun-an.
Ang bag-ong Yaw-Yan headquarters nahimutang sa ikaupat nga andana sa Coast Pacific Building atbang sa UC-main campus sa dalan Sanciangko, ning siyudad.
Ang bag-ong gym sa Yaw-Yan ArDigma, giblisingan niadtong Disyembre 8, piyesta sa Immaculate Concepcion.
Matud ni Caniga nga modawat na sila og mga tinun-an nga gustong makat-on sa disiplina sa Yaw-Yan ArDigma o “Sayaw ng Kamatayan.”
Ang Yaw-Yan nga unang gipakatap ni grandmaster Napoleon A. Fernandez, usa ka martial arts nga nagtudlo sa hustong paggamit sa sukmag, patid, ulo, siko ug tuhod.
Gawas sa Yaw-Yan, nagtudlo usab sila og arnis, boxing ug Mixed Martial Arts (MMA).
Alang sa dugang mga detalye, niadtong interesado mahimong motawag sa 0919-8215582. (FREEMAN NEWS)