Dr. Yong, Donna modagan sa 2009 Macau Marathon

CEBU, Philippines - Nagpanikad na ang inilang eye-doctor nga si Dr. Potenciano 'Yong' Larrazabal III ug ang iyang asawa nga si kanhi singer-actress Donna Cruz nga modagan sa 2009 Macau Marathon nga gikatakda karong Domingo.

Mao unya kini ang ikawalong international marathon nga salmotan ni Dr. Yong ug labing una nga marathon ni Donna.

Niadtong Septiyembre, si Dr. Yong mitapos sa makutas nga Experian Robinhood Festival of Running 2009 Marathon didto sa Nottingham, United Kingdom.

Gawas sa running couple, mouban usab nila ang ilang trainer nga si Harty Satina, kinsa mosalmot sab sa   lumba.

Giangkon ni Dr. Yong nga grabe ang giagian niyang training ug preparasyon alang sa maong lumba.

 Lakip sa iyang training regiment mao ang pagdagan gikan sa siyudad sa Sugbu ngadto sa Danao City nga iyang gidagan sa makaduha ka higayon aron anaron ang iyang lawas sa usa ka long distance run. – BANAT NEWS