CEBU, Philippines - Mitamla og daog ang Bureau of Internal Revenue (BIR) squad ni regional director ug team manager Rodita Galanto batok sa Bureu of Immigration (BI), 33-28 sa nagpadayong Association of Regional Executives in National Agencies (ARENA-7) Sportsfest 2009 basketball tournament diha sa Benjamin Solon Memorial Gym sa barangay Cogon, Ramos, ning siyudad.
Parehong wala mogana ang tirada sa duha ka kampo, apan nakabentaha ang BIR human sa ilang 15-4 nga rally sa fourth period nunot sab sa ilang pagdominar sa rebounding ug sa hugot nga depensa.
Ang presensiya sa kanhi power forward sa USC Warrior nga si James Engel Sievert maoy nahimong dakung instrumento sa kadaugan sa BIR tungod kay walay nakapugong kaniya sa ilawom.
Si Leo Galvez maoy nangu sa BIR sa iyang 12 puntos, samtang sila si Shenjie Pananganan ug Danny Verniel mao sab ang nangu sa pilderong BI nga parehong mi-iskor og 10 puntos.
Puntos Matag Usa
BIR (33) - Galvez 12, Lariosa 6, Meso 4, Diamos 3, Sievert 3, Dizon 2, Del Rosario 2, Pacana 1
Immigration (28) - Pananganan 10, Verniel 10, Retuya 4, Simborios 4, Canete 2. – BANAT NEWS