John Videoke, Yan C Rico mimakmak sa ilang kontra sa LLBA summer league

CEBU, Philippines – Nagkahayag ang kahigayonan nga mapanalipdan sa defending champion John Videoke ang ilang korona human midaog batok sa 13K Motorparts, 53-50 sa ilang "best-of-three" semifinal series sa Lapu-Lapu Basketball Association (LLBA) Summer League didto sa Bliss Pajac open court.

Ang John Videoke ni team owner Elly Gomos gipangulohan ni Verzosa, kinsa mi-iskor og 20 puntos, gisundan ni Bagano nga adunay 10 puntos.

Si Patalinghug miabuno og otso puntos, samtang sila si R. Gomos ug E. Gomos parehong mikutlo og singko puntos.

Sila si Alan Yu ug Ygot nga nagkumboya og 26 puntos maoy mitimon sa naparot nga 13K Motorparts. Si Yu mipupo og 14 puntos ug si Ygot miani og 12 puntos. Sila si Lito Magat, Bardago ug Impas miabuno og otso puntos matag usa.

Sa laing bahin, si Ram Gomez milansang og 17 puntos aron pangulohan ang Yan C Rico pagmakmak sa Rollway sa iskor nga 80-76.

Laing duha ka magduduwa ang mirehistro og double figures alang sa Yan C Rico. Si Pompi Ngojo mikimada og 15 puntos ug si Ebanez mikulit og 12 puntos.

Si Casquejo maoy topscorer sa Rollway pinaagi sa iyang 28 puntos, gisundan ni A. Sepe sa iyang 14 puntos.

Ang LLBA Summer League gipaluyohan ni Mayor Arturo Radaza, Brgy. Capt. Paz Radaza ug Tambuli Beach Resort general manager Boy Castreras.

Ang mga committee naglakip nilang Andres Baterller, Ian Pino, Archie Sulla, Ronyo Noval, Edward Delposo, Junrie Berido ug Francis Igot.

Puntos Matag Usa

Unang duwa:

JOHN VIDEOKE (53) - Verzosa 20, Bagano 10, Patalinghug 8, R. Gomos 5, E. Gomos 5, Fernandez 3, Daluz 3

13K MOTOR PARTS (50) - Yu 14, Ygot 12, Bardago 8, Magat 8, Impas 8

Ikaduhang duwa:

YAN C RICO (80) - Gomez 17, Ngojo 15, Ebanez 12, Portugalisa 9, Alvis 7, Lungay 7, Velasquez 6, Nadado 6, R. Godinez 5, Labadan 5

ROLLWAY (76) - Casquejo 28, A. Sepe 14, Eroles 10, Fausto 7, Bensi 5, Palad 4, Intes 4, Llenis 3 – BANAT NEWS