CEBU, Philippines – Andam na ang team Cebu City nga modepensa sa ilang titulo isip best junior squad sa nasud sa dihang ang 2009 Milo National Open Track and Field Championships mosikad karon didto sa Don Narcisco Ramos Sports and Civic Center sa Lingayen, Pangasinan.
Naglantaw ang mga Sugbuanon og mohakot og laing bulawan human sa ilang kalampusan sa bag-o lang nga 2009 PRISAA National Games.
Ang Cebu City squad gilangkuban sa mga runners gikan sa University of Cebu (UC) nga naglakip nilang Lyndley Fran Navaja, Irin Baluran, Jasper Basister, Lera dela Calzada, Carl Malazarte, Francis Beriso ug Vlessica Jagna.
Bugtong sakop sa koponan nga dili gikan sa UC mao si Mark Agdasiw, kinsa gikan sa University of Southern Philippines Foundation (USPF).
Si Mendel Lopez, laing runner sa USPF moapil sab sa tigiay ug midagan kini sa senior division. – BANAT NEWS