CEBU - Gipalagpot sa Trisha and Carl ug sa Criminal Intelligence and Investigation Bureau (CIIB) ang tagsa-tagsa nila ka kaatbang aron mag-abot alang sa championship showdown sa Labangon Youth Association (LAYA) 1st Ritchie Osmeña Cup didto sa Labangon Sports Complex.
Ang Trisha and Carl naka-eskapo bitbit ang 65-61 nga kadaugan batok sa Lola Carmen Chicharon sa crossover semis, samtang ang CIIB nga gipangulohan ni Police Supt. George Ylanan miangkon sa katapusang luna sa finals pinaagi sa pagpukan sa Green team sa iskor nga 70-60.
Ang duha ka malampusong koponan magsangka karong gabii alang sa tinaktakay nga kampiyonato, samtang ang mga pildero mag-ilog alang sa ikatulong dapit.
Si Jade Flores mi-iskor og 21 puntos aron pangulohan ang Trisha and Carl, apan ang daku'g papel sa maong kadaugan mao si Marcelo Zapanta tungod sa iyang "crucial points." Si Zapanta mitampo og 17 puntos ug si Andrew Navaja miamot og 11 puntos.
Si Noel Medalle, kinsa miburak og 24 puntos maoy nangulo sa Lola Carmen.
Sa laing bahin, si Roy Veloso mitali og 25 puntos, samtang si Supt. Ylanan adunay 10 puntos alang sa kalampusan sa CIIB. Sila si Roy Navaja, Robby Ylanan ug Mocong Abella parehong mi-iskor og double figures sa pilderong Green team. (BANAT NEWS)