CEBU - Wala mosalir ang kabangis sa Coca-Cola Tigers dihang gipanitan kini sa Alaska Aces, 99-83 sa KFC-PBA Philippine Cup kagabii didto sa Araneta Coliseum.Pagsugod pa lang, midiga na sa ilang maayong labok ang Aces kortesiya nilang L.A Tenorio ug Willie Miller nga nagkumboya og 25 puntos aron pagposte og 49-35 nga bentaha paingon ngadto sa second quarter.
Lima ka magduduwa sa Aces ang mirehistro og double figures alang sa maong kadaugan. Si Tenorio, kinsa maoy player of the game miposte og 18 puntos uban ang lima ka assists, gisundan nilang Miller ug Joe Devance nga mikulit og 16 puntos matag usa, samtang ang beteranong si Jeffrey Cariaso mihirit og 14 puntos alang sa Aces nga mibundak karon og 10-3 win-loss nga baraha.
Nagpadayon ang pagpanghasi sa Aces sa third quarter, niining higayona si Larry Fonacier na ang mitimon. Si Fonacier miani og 13 puntos lakip na ang tulo ka three-point shots aron inaton ang labaw ngadto sa 20 puntos, 80-60.
Ang sentro nga si Asi Taulava maoy nangulo sa giihaw nga Tigers pinaagi sa iyang 20 puntos ug milangkat og 15 ka rebounds. (THE BANAT NEWS)