Red ug Maroon -0 ang tuyo

CEBU - Tinguha ugmang adlawa sa Red-Binlens Team ug ang Maroon Team nga mokulit sa ilang ikaduhang daug atol sa pagpadayon sa Labangon Youth Association (LAYA) 1st Ritchie Osmeña Cup didto sa Labangon Sports Complex.

Suwayan sa Binlens pagpukan ang mga operatiba sa Criminal Investigation Branch (CIB) ubos sa pagpangu ni Supt. George Ylanan atol sa ilang debut sa LAYA ugmang adlawa samtang ang Maroon naglaraw sa pagpukan sa wa pa’y daug nga Yellow team.

Atol sa duwa sa miaging Sabado, ang Trisha & Tracy midaug batok sa Lola Carmen Chicharon sa iskor, 68-62 samtang ang Green Team midaug sab batok sa Black Team sa iskor, 78-72.

Ang Trisha & Tracy ug ang Lola Carmen pareho na karon naghupot og 1-1 nag baraha.

Si Jade Flores mihakot og 23 puntos aron pangulohan ang Trisha & Tracy ug mi-iskor sab sila si Andrew Navaja ug Marcelo Zapanta og 12 ug ingon man 11 puntos.

Sa ikaduhang higayon gipangulohan ni Noel Medalle ang Lola Carmen apan niadtong tungora, wala na makatay-og ang iyang 14 puntos.

Sa laing bahin, upat ka players sa Green Team ang mi-iskor og double figures nga gipangulohan ni Mocong Abella kinsa mikamada og 24 puntos samtang si Macoy Sangcada midugang ug 17 puntos ug si Angel Navaja mitampo sab og 15 puntos.

Si Marvin Siatong mi-iskor og 21 puntos alang sa Black Team samtang si Bobby Reyes mihipos og 13 puntos.

Puntos kada usa:

First Game:

Trisha & Tracy (68)— Flores 23, Navaja 12, Zapanta 11, Jabines 6, Baquello 5, Nemeño 4, Romanos 3, Sacedon 2, Dayundon 2

Lola Carmen (62)—Medalle 14, Papellero 8, Gallardo 7, Ylanan 6, Maambong 6, Alega 4, Allanic 4, Sasan 2, Escat 2, Villaraza 2

Second Game:

Green (78)—Abella 24, Sangcada 17, Navaja 15, Ynot 14, Pañares 4, Gallardo 2, Bacalla 2

Black (72)—M. Siatong 21, Reyes 13, Luage 9, Trinidad 8, Siatong 6, Parba 5, Taboada 5, Matañoza 3, Ylanan 2. – BANAT NEWS