Sister teams mag-abot karon

Manghina-ot ang Barangay Ginebra nga mokulit na sab og laing kadaugan samtang mosungay na sab ang Batang Red Bull sa nagpadayong Smart-PBA Philippine Cup didto sa Cuneta Astrodome.

Mga duwa karon: (Cuneta)

4:35 pm Welcoat vs. Red Bull

7:20 pm Coca-Cola vs. Ginebra

Mokadlit na sab ang Gin Kings batok sa ilang igsoong team ang Coca-Cola Tigers nga gilaumang usa ka eksplosibong duwa.

Sayo ning adlawa, suwayan usab sa Red Bull ang pagpabilin sa ikaduhang pwesto atol sa ilang pakigbagat sa Welcoat Dragons.

Nahimutang karon sa ikaduhang pwesto luyo sa Purefoods ang Red Bull sa ilang 8-5 nga baraha. Tungod ning maong bentaha, paningkamotan sa Red Bull ang pagyabo sa Welcoat nga aduna lay 3-11 nga baraha.

Ang Red Bull palig-onan nilang Willie Miller, Celino Cruz, Mic Pennisi ug mga rookies Larry Fonacier, Paolo Bugia ug Leo Najorda.

Sa laing bahin, mahimong kulba-hinam karon ang mahimong resulta sa duwa tali sa Ginebra ug Coke ilabi na gayud og mo-arte og maayo sila si Ronald Tubid, Jayjay Helterbrand og Mark Caguioa.

Ang Ginebra nahimutang sa ika-unom nga pwesto sa ilang 6-8 nga baraha ug mas ubos gamay ang Coke nga anaa mahimutang sa ikapitong pwesto.