Nemesis ug Velonauts team misaka sa kinatas-ang dapit

Si Hitler Nemesis ug ang Team Velonauts misaka sa kinatas-ang dapit sa standing sa RECYCLE Cycling Series human midaog sa 6th leg diha sa Mandaue City reclamation area.

Si Nemesis aduna nay 79 puntos human sa iyang kadaugan batok ni Haylin Bardaje sa Lapu-Lapu RUT. Mipahiluna sa ikatulong dapit mao si Stephen Chian sa Kleen.

Ang ikaupat nakuha ni Ian Colina sa Velonaut ug ang mikapyot sa ikalima mao si Orlan Toring sa RUT.

Sa overall individual standings, nagsunod ni Nemesis mao si Junjun Canasa sa Kalit sa iyang 58 ug Richard Patalinghug sa iyang 55 puntos.

Sa laing bahin, ang Velonauts nagpabilin sa kinatas-ang dapit sa team category human miposte og sunod-sunod nga kadaugan.

Sa pagka karon, ang Velonauts nakapundo na og 161 puntos, gisundan kini sa Lapu-Lapu RUT nga mipupo og 139 puntos ug Team Kalit nga adunay 114 puntos.

Ang Sparkleen maoy mipatong sa ikaupat nga dapit uban ang 70 puntos, samtang ang Super Climbers maoy mikapyot sa ikalima nga dapit sa ilang 60 puntos.