Higit P1.6 milyong shabu nasamsam, bigtime drug pusher timbog

MANILA, Philippines — Nasabat ng Quezon City Police District (QCPD)  ang nasa higit P1.6 milyong halaga ng shabu  kasabay ng pagkakaaresto sa isang bigtime drug pusher sa isinagawang buy-bust operation  sa Brgy. Bahay Toro, Quezon City.

Himas rehas sa  QCPD-Project 6 Police Station (PS 15) si  Ricardo Dominique Del Mundo, 21, residente ng  Project 8, Brgy. Bahay Toro, Quezon City.

Sa report ni PLtCol. Richard Mepania, Station Commander ng  PS 15 kay  QCPD Director PBGen. Redrico Maranan, kasama ang  PDEA, RO-NCR,  isinagawa ang buy-bust operation nitong Biyernes dakong alas-10:30  ng gabi.

Sa mismong bahay ng  suspek isinagawa ang  buy-bust operation matapos na makatanggap ng impormasyon ang  pulisya  hinggil sa  illegal drug operation ng  suspek.

isang pulis ang nagsilbing poseur buyer at nakabili ng halagang P5,000 shabu mula kay Del Mundo na humantong sa pagkakaaresto nito.

Nakuha sa suspek ang nasa 240 gramo ng shabu  at buy-bust  money.

Nahaharap sa  kasong paglabag sa R.A. 9165 o Comprehensive Dangerous Drugs Act of 2002 ang  suspek.

“Tuloy-tuloy po ang operasyon ng inyong kapulisan kontra iligal na droga dito sa ating Lungsod Quezon upang tuluyan ng matuldukan ito at mai­salba ang maraming buhay”, ani Maranan.