Smoker ang boyfriend

Dear Tito Miguel ,

Ako diay si Perly, taga Tabogon, Cebu. Akong uyab nga si Gary kay  smoker kaayo. Mura'g sa usa ka adlaw, 10 ka sticks ang iyang mahurot. Kapila na nako siya gibadlong nga mohunong na sa pagpanigarilyo kay makadaot na. Apan dili gyud siya mopatoo . Dili gyud kahibalo nga maghuna-huna. Makasapot tawhana.  Unsaon mani nako siya Tito Miguel ? .Salamat kaayo . — Perly

* * *

Perly,

Lisod na paundangon. Ang panigarilyo kay usa ka matang sa addiction. Maski ganahan na siya moundang, iyang lawas mangita mismo. Apan dunay pipila  nga hingpit nakabiya sa maong bisyo. Determinasyon ang solusyon. Sama sa babaye nga manigarilyo apan ini’g mabdos niundang kay kinahanglan.

Imong uyab pahinay-hinaya lang aron dili makalitan. Kun 10 ka sticks iyang naandan matag adlaw, agniha nga kuhaan sa ginagmay apan kanunay. Kuhaan niya’g usa ang napulo. Dunay purohan mailad niya iyang lawas kay usa ra ang nawagtang. Dili kini mangita, dili niya mabantayan nga siya nawad-an. Kun maanad na siya sa 9 imbis 10 ka sticks, kuhaan na sad niya’g usa hangtod nga gamay na lang ang mabilin. Ingna ang kuwarta nga iya unta ipalit sa sigarilyo inyong tigomon apan ikaw ang magkupot. Gamay ra ang kantidad apan kun tigomon ug kalimtan, kalit lang ni  modako human sa usa ka tuig. Diha niya makita ang kantidad nga iyang gisunog apil iyang baga.

Angay sad ka mangusog nga kun kuyog mo duha, bawal siya manigarilyo. Kay susama ra ang epekto sa sigarilyo sa nisuyop niini ug gibughan sa aso nga daw tambutso. Kun dili ni niya buhaton, timailhan kini nga dili ka niya hingpit nga gihigugma. Kay kun tiunay siya kanimo, dili siya makaako nga maangin ka sa gitawag nga second-hand smoke. Busa kun sige mo og kuyog, magkataas ang panahon nga dili siya manigarilyo. Sa laktod, kuhai lang gamay iyang bisyo, apan ayaw hikawi. Mangita gyud na. Kun imo pugngan, samot na nga maganahan.   —Tito Miguel

Magpatambag ka? Ipada kang Tito Miguel: 0991-318-9366