Senior naligsan og trak

CEBU, Philippines — Patay ang usa ka 65-anyos nga babayeng senior citizen human kini naligsan sa usa ka trailer truck sa dihang milabang kini sa taytayan diha sa South Road Properties sa Dakbayan sa Sugbo, pasado alas-10 sa buntag kagahapon.

Ang biktima ma si Consolacion Dinalo Rosal, 65, residente sa dakbayan sa Talisay samtang ang driver sa trailer truck mao si Gregorio Canonero Geoco, 47, residente sa Barangay Balud, Lungsod sa San Fernando.

Sa imbestigasyon sa Traffic Enforcement Unit sa Cebu City Police Office ang trailer truck padung sa habagatan niadtong higayuna.

Ang biktima gikatahong molabang unta sa may taytayan nga utlanan sa Cebu City ug Talisay City diha sa SRP.

Matud ni Police Major Jonathan Dela Cerna, hepe sa Traffic Enforcement Unit sa CCPO nga normal ra ang dagan sa trailer truck apan sigon matud pa sa driver naay sakyanan sa iyang tuo nga habig ug na blindspot siya hinungdan nga wala siya makabantay sa biktima.

Didto na kini matud pa nakabantay nga naa siya’y naligsan dihang mipaka ang atubangan nga bahin sa iyahang sakyanan.

Ang driver sa trailer truck pagkahuman masayod nga nakaligis siya og tawo daling misakay og motorsiklo paingon sa Lawaan Police Station kay mi-surrender.

Si Police Corporal Ariel Balde sa Traffic Office uban ang City of Talisay Traffic Operations and Development Authority (CT-TODA) mitugyan sa driver sa Traffic Enforcement Unit sa CCPO.

Ang tag-iya sa trailer truck ug ang mga kabanay sa mga biktima nag-abot sa opisina sa TEU .

Ang driver sa trailer truck mag-atubang og kasong Reckless Imprudence Resulting in Homicide.

Nag-cellphone

Niadtong Sabado sa kaadlawon, usa ka SUV ang nalimbuwad diha sa Cebu South Coastal Road sa eskina sa dalan padung sa Barangay San Isidro, Dakbayan sa Talisay.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga babaye ang nagmaneho sa sakyanan samtang naa sab kini kuyog nga babaye.

Mingaw ang dalan niadtong tungara samtang paingon ang duha ngadto sa habagatang bahin.

Apan nigawas sa pasiuna nga imbestigasyon nga naggamit og cellphone ang drayber niadtong tungora samtang nagmaniho hinungdan nga wa nakakontrolar ang manobela nga hangtud natuwad ang sakyanan.

Gidala sa tambalanan ang duha ka babaye ug padayon kini nga giatiman.

Si Tumulak niingon nga ubos sa RA 10913 o Anti-Distracted Driving Act gidili gyud ang paggamit og cellphone samtang nagmaneho kay makadisturbo kini ug gibutang niini sa peligro ang kinabuhi sa drayber ug sa uban.

Gitun-an pa karon kung angay ba gyud nga kasohan ang drayber sa SUV. — /IBM (BANAT NEWS)