38 ka punoan sa kahoy ibalhin

CEBU, Philippines — Gisupak Ni Konsehal Sisinio “Bebs” Andales sa sugyot nga putlon o ibalhin ang 38 ka punoan sa kahoy sa Good Shepherd Road, Banawa, Barangay Guadalupe sa Dakbayan sa Sugbo tungod kay gitan-aw nga makababag kini sa konstruksyon sa building project sa DMCI Homes.

Gipadayag ni Andales ang iyang pagsupak atol sa deliberasyon sa konseho kun diin gihisgotan ang aplikasyon sa DMCI Homes Cebu Office alang sa earth balling o pagbalhin sa 21 ka kahoy ug pagputol sa laing 17 ka kahoy sa maong lugar.

Si Konsehal Joel Garganera kinsa tsirman sa Committee on Environment maoy miduso sa inspection report ngadto sa konseho gikan sa Cebu City Environment and Natural Resources Office (CCENRO) nga nangayo og resolusyon sa konseho kalabot sa maong aplikasyon.

Matud pa sa CCENRO, nagpahigayon ang ilang team og ocular inspection sa lugar niadtong Marso 13, 2026.

Giubanan sila sa mga representante sa DMCI Homes Cebu Office sa pag-inspeksiyon ug pagsukod sa mga kahoy nga apektado sa proyekto.

Base sa inspection report, gipamatud-an sa mga opisyal sa CCENRO nga gustong ipabalhin o putllon sa aplikante ang mga kahoy tungod kay makababag kini sa konstruksyon sa ilang proyekto.

Lakip sa mga kahoy nga gitaho nga apektado mao ang Neem Tree, Lanutan, Alim, Kamachili, Calachuchi, Tugas, Ipil-Ipil, Narra, Binunga ug Mansanitas.

Apan si Andales nag-ingon nga mahinungdanon ang mga kahoy sa pagpanalipod sa kinaiyahan ug paghatag og limpyo nga hangin ilabi na karon nga nagkagrabe na ang polusyon tungod sa kagamay nalang mga kahoy.

Wala sab siya makauyon nga samtang kanunay nga giawhag ang gobyerno nga magtanom og mga kahoy sa palibot, ang CCENRO pa mismo mao karoy naghangyo sa konseho nga aprubahan ang pagputol sa mga kahoy.

Samtang, nirekomendar sab si Garganera nga i-defer una ang maong aplikasyon ug giuyonan kini ni Bise Mayor Tomas Osmeña.

Mipasabot sab si Osmeña nga nasinati na niya ni nga sitwasyon sa unam dunay mga kahoy nga nakababag sa mga proyekto sa imprastraktura.

Apan ang iyang gibuhat kaniadto mao ang pagtanom og dugang nga mga kahoy puli sa mga gipamutol sama sa nahitabo sa Mango Avenue human sa Bagyong Ruping, diin gipangputol ang mga kahoy aron mapalapdan ang dalan ug makabaton og lapad nga dalan sa uptown area.

Gipasabot usab ni Osmeña nga ang pipila ka mga kahoy sa dalan paingon sa airport, sa Beverly Hills sa Guadalupe ug sa Fuente Osmeña gitamnan pinaagi sa paningkamot sa siyudad.

“We understand the need to keep our trees. But at some point, if we choose between the people and the trees, we will just plant more trees,” matud pani Osmeña.

Matud pa usab niya nga usa kini sa rason nganong wala siya niya patamni og mga kahoy ang South Road Properties (SRP) kay napanglantawan na niya nga mahimo kining babag sa umaabot nga mga proyekto sa maong lugar.

"If I had planted trees in SRP, NUSTAR and Filinvest will not be there. None of them will be there," suma pa sa bise mayor.

Sa pagkakaron, wala aprubahi ang aplikasyon sa DMCI Homes ug tukion pa kini og balik sa konseho. — /IBM (BANAT NEWS)