Suporta gikan sa 13 ka nasud

Sa labing unang higayon gihimo ang lapad nga kalihokan pagtimaan sa ika-10 nga anibersaryo sa kadaugan sa Pilipinas batok sa China atubangan sa United Nations (UN) arbitral tribunal niadtong Hulyo 12, 2016.

And 2016 arbitral award naghatag sa Pilipinas sa katungod sa kontrobersiyal nga West Philippine Sea gikan sa way basihan nga pangangkon sa China. Kabahin sa lapad nga kalihukan tibuok nasud mao ang martsa alang sa kalinaw nga gipasiugdahan mismo sa armadong kusog sa nasud, Department of National Defense, Philippine Coast Guard lakip na sa nagkadaiyang hut-ong sa katilingban.

Dinhi sa Sugbo ang mga dagkong tunghaan mibutang og dagko nga mga banner nga nagdeklarar sa katungod sa Pilipinas sa West Philippine Sea.

Ug sa usa ka talagsaon nga hiniusang pamahayag, 14 ka mga nasud ang mipadayag sa ilang suporta sa katungod sa Pilipinas sa giilogan nga teritoryo.

Lakip sa mga mipirma sa joint statement gawas sa Pilipinas mao ang United States, Australia, Canada, Estonia, Germany, Italy, Japan, Latvia, Lithuania, New Zealand, Romania, Slovenia ug United Kingdom.

Matud sa maong mga nasud nga ilang gipaluyohan ang arbitral ruling ug nga nagpabilin silang komitido alang sa "free and open Indo-Pacific that is peaceful, stable, and rules-based."

Matud sa pamahayag nga ang panagbangi sa teritoryo sa kadagatan angayang sulbaron sa malinawon nga paagi pinasubay sa United Nations Convention on the Law of the Sea (UNCLOS).

Nagkanayon ang 14 ka mga nasud nga way legal nga basihanan ang pangangkon sa China og kabahin sa teritoryo sa Pilipinas.

Lanog ug makabungog ang sentimento sa 14 ka mga nasod ug dakong sagpa sa China nga hangtod karon way hunong sa iyang papating. B

isan nagbinugtong sa iyang baruganan pagsalikway sa arbitral award ug pag-insister nga kabahin sa ilang teritoryo ang WPS bisan maabot ra og labayon gikan sa labing duol nato nga isla, way kaikog ug bisan gamay’ng uwaw ang China nga nagmagahi sa sayop nilang baruganan.

Hinaut mosantop sa huna-huna sa mga opisyal sa China nga kun husto pa sila sa ilang pangangkon duna untay laing mga nasud sa kalibutan nga mopaluyo nila.

Ug hinaot makahuna-huna ang ilang mga lider nga mohunong na sa pagpanghasi sa mga Pilipino nga mangingisda ug sa mga sakop sa Philippine Coast Guard nga nagpatrolya sa teritoryo sa Pilipinas.