Misiaw na usab ang mga makililimos

Nisamot og siaw karon ang mga tawo nga magpakilimos sa kadalanan ilabi na pagtungtong gyud sa “ber” months.

Gigamit nila ang panahon alang sa nahimo nilang panginabuhi ang pagpangayo gikan sa ubang mga tawo. Kasagaran ba kanila mga himsog man og lawas.

Duna gani mga batan-on pa ug kompleto sa ilang mga kamot ug tiil nga magamit unta sa pagpangita og desente nga panginabuhi. Dili sa pagpakaubos niining mga tawhana.

Apan gipasulabi nila ang ilang katapolan kay gitugotan man usab sa uban ang ilang naandan kay mohatag usab lagi kong pangayoan.

Bisan ako gani kong tan-aw nako nga angayan nga kaluy-an mohatag man pud ko pero naa gyuy magbalik balik nalang.

Dili lang ang grupo niining minority nga naila sa pagpakilimos ang misiaw karon kon dili adunay daghan nga mga bata nga manaygon.

Seguro aron sila makatigom pangbalon sa eskwelahan pero delikado kaayo ang ilang kahimtang simbako nataymingan sila sa disgrasya.

Asa man ang ilang mga ginikanan ngnong gipasagdan man sila kay lagi Pasko na? Paita dili kaigo ang sentabos nga ilang makuha sa ibayad sa tambalanan ugaling mataymingan sila sa aksidente.

Duna man untay gipangsangonan sa pagtutok niining mga naglatagaw sa kadalanan apan asa naman sila? Sa dakbayan sa Sugbo lang naa man ang Anti-Mendicancy Board nga gisuportahan sa mga tinugyanan sa balaod apil na ang Department of Social Welfare and Development.

Komusta na kaha ang ilang programa? Kong kahinumduman dunay presscon niadtong nakalabay’ng tuig nga nagpahibawo sa ilang himoon nga mga rescue operations, ilabi na niining mga bata nga galibud suroy pero wala may resulta, unsa man to for media milage? Makasabot kita sa sitwasyon sa mga ahensiya kay lagi bisan unsaon nila, i-rescue man o hatagan og gamayng ayudad aron mobalik sa probinsyia pero mobalik ra gihapon, kobrahon ra ang ayuda pero ilaron ra ang mga nagtabang nila.

Unya mo-surrender nalang ang guberno pasagdan nalang sila?

 Mora’g plakang gubaon nga gabalik-balikon og tuki kining isyuha. Apan gikinahanglan nato silang pahinumduman nga mas butangan og gibug-aton ang mga programa aron mawagtang ang mindset sa mga tawong tapolan nga naanad na sa pagpakilimos.

Hatagan gyud unta og kongkretong solusyon ang problema kay magsegi lang kita og tagawtaw ani.

Kanang uban nga mga inahan nga magdaladala sa ilang anak nga masuso o inahan ba gyud kaha na kay basin gigamit lang ang bata isip props aton kaluy-an. Angayan unta nga higpitan kini sa pagbawal kay dako kini nga abuso sa bata nga mainitan ug mauwanan intawon.

Sensitive kaayo kita basta isyu na sa bata ang hisgotan kay lagi angayan nga kaluy-on ug panalipdan. Pero kining mga gikugos kugos sa mga makililimos exempted diay?

Paita gud kong mauhom. Kining mga bataa nga magtubo sa pagpakilimos, sila ra usab ang mosunod sa lakang sa ilang mga ginikanan kay mao man ang ilang naandan.

Atong suknaon unya kong available ang mga ahensiya kon naa na ba silay mga programa nga malungtaron nga makamugna og kausaban sa kinabuhi niining mga tawhana nga dili magpangayo sa uban inay mangita sila og panginabuhian gamit ang ilang kusog ug katakos.

Panginabuhi nga adunay dignidad.