EDITORYAL -   Kalisdanan sa magtutudlo

Excited na ang mga tinun-an ug mga magtutudlo sa pagbalik na unya sa naandang mga bulan sa tingklase karong Hulyo ning tuiga.

Kini human giaprubahan na ni Presidente Ferdinand Marcos Jr. ang sugyot nga ibalik sa naandang bulan ang pagbukas sa klase nga himuon matag bulan sa Hunyo.

Karong tuiga, sa Hulyo una kini magsugod tungod kay uwahi naman sab kaayo natapos ang klase sa mga bata, sa kataposang semana sa bulan sa Mayo, kinahanglan pa silang mopahuway ug ang mga magtutudlo.

Sa sunod tuig, buhaton na kini sa bulan sa Hunyo. Gibalik kini sa naandan tungod peligro kaayo sa mga bata ug mga magtutudlo ang magklase panahon sa ting-init.

Apan kun na excited na ang mga magtutudlo ug mga tinun-an, dunay mga magtutudlo nga tingali naguol o ba kaha makaingon nga lahi na sab kini nga dugang sagubangonon.

Partikular niini kadtong mga magtutudlo nga nadestino sa mga hilit nga lugar o ba kaha naa sa kabukiran nga walay tarong karsada aron makaagi ang mga sakyanang de pasaheroan.

Kada adlaw kinahanglan nila kining buhaton aron makatudlo. Sa uban nga adunay klaro-klarong agianan mahimo rang mosakay og habal-habal o motorsiklo.

Apan sa mga lugar nga wala gyuy tarong nga agianan, dunay mga magtutudlo nga magsakay gyud og kabayo tungas sa mga bungtod.

Daghan niini didto sa Mindanao, mga magtutudlo nga mirisgo sa ilang kinabuhi para lang makatambong sa ilang gitudloang mga eskuylahan nga naa sa bukid.

Swerte na kaayo kining ubang mga magtutudlo nga nadestino sa patag kay parehas ra sila og sweldo sa mga magtutudlong nadestino aning mga hilit nga mga dapit.

Kay kini sila, anha man mokuha og pamelete sa ilang sweldo, apan kun sa risgo ang hisgutan, mas kanunay silang naa duol sa disgrasya aning pagsakay sakay og mga habal-habal o kabayo pagsaka sa mga bungtod ug paglabang sa mga sapa nga way mga taytayan.

Tingali kinahanglang atimanon sa Department of Education kining kahimtang sa mga magtutudlo nga medyo mas lisod og lugar nga nadestinohan.