Modelo ang Davao

Ang atong mga opisyal sa kagamhanan dili na kinahanglang moadto pa og layo nga lugar aron paghimo og Lakbay-Aral kon ang ilang katuyoan mao ang pagpatuman og limpyo nga kasapaan dinhi sa Cebu City.

Dia ko karon sa Davao City ug dihang paingon na nga motugpa ang eroplano nga akong gisakyan, nasud-ong nako sa kinaubsan ang kaanindot ug kalimpyo sa nag-ikis-ikis nga kasapaan sa ubos. Ambot og unsa to nga dapita, ug tingali ang mga suheto sa Davao City nahibawo gyud kon asa dapita kadtong maong sapa. Wa gud nako kapugngi ang pagpahiyom nga nagtan-aw sa sapa.    

Unya kalit lang misantop sa akong hunahuna ang hugaw kaayong kasapaan sa Sugbo. Sa Davao, daghan sab og kabalayan nga nahimutang daplin sa maong sapa, apan wa man sila manglabay og sagbot ngadto sa sapa.

Misantop sa akong hunahuna nga tingali ang rason nga malampuson ang mga opisyal sa Davao pagbadlong sa mga tawo nga dili manglabay og basura sa kasapaan kay estrikto sila nga mosilot sa maghugawhugaw sa sapa. Ang nakalahi kay dinhi sa Dakbayan sa Sugbo, ingon sa magpanuko ang atong mga opisyal sa pagpahamtang og silot ngadto sa mga malapason sa balaod.

* * *

Si Cebu City Councilor James Cuenco mipatawag og special meeting sa mga sakop sa Cebu City Traffic Management Board karong hapon, Huwebes. Tungod niini, giawhag dayon ni Cebu City Councilor Rey Gealon ang mga sakop sa Traffic Board nga motambong sa special meeting karong hapon.

Gusto man gud ni Cebu City Acting Mayor Raymond Alvin Garcia nga mohimo og resolusyon ang Traffic Board kabahin sa mga gipanghimo sa Tokagawa Global Corporation nga wa na masubay sa mga lagda sa Joint Venture Contract sa siyudad.

Ang Cebu City government nakigkontrata sa Tokagawa sukad pa sa termino ni kanhi Mayor Tomas Osmena, Edgardo Labella ug karon kang Mayor Mike Rama nga sila maoy mangolekta sa parking fees sa mga moparking daplin sa karsada, ug mohatag ra sila sila og P8.7 Million sa usa ka tuig.

Sa kontrata way labot ang Domingo, nga sa ato pa, gidid-an ang Tokagawa pinaagi sa CEPMA nga mangolekta sa maong adlaw, apan miinsister gyud ang Tokagawa nga mangolekta sila. Gani, kutob ra sa alas siete sa gabii ang gitugot nga sila mangolekta, apan giabot sab gihapon ngadto sa alas 9 sa gabii. Sa laktod, abusado gyud kaayo nga mora'g may gisaligan ba.

Mao na ang rason nga dunay mga opisyal sa siyudad nga nangasuko, ug kon duna may wa masuko, kadto ra tingaling tua nakapusta sa Tokagawa. Ang tinuod, nabentahaan gyud ang kagamhanan sa siyudad niining transaksyon tali sa Tokagawa. Kon basahon nimo ang kontrata, mora gyud og ang Tokagawa namutang og mga parking equipments sa daplin sa mga karsada nga gihimong parkingan, apan wa diay.

Mao ni nga ang Commission on Audit (COA) miingon gyud nga ang kontrata nga gisudlan sa Cebu City government ug sa Tokagawa, alkanse ang siyudad, ug maisip ra nga gihatagan nila'g higayon ang Tokagawa nga makanegosyo gamit ang mga karsada nga iya sa kagamhanan.