LAM nayamyam
Tapos hinganli ni Presidente Bongbong Marcos atubangan sa media og professional liar si kanhi PDEA agent Jonathan Morales, gidad-an dayon ni Sir Jonathan og CCTV footage ang 3rd PDEA Leaks Senate hearing, diin makita-madungog ang usa ka negosasyong bribery sagol pagpanghadlok, nga mao mismoy miduol-adto sa ilang balay, diin may CCTV cameras diayng nagbantay.
Miangkon si Romy Enriquez, kanhi PDEA agent usab ug suod higala ni Sir Jonathan, nga iyang kumpareng Eric ‘Pikoy’ Santiago, mihangyong pakig-istoryahan personal si Sir Jonathan dala ang nagkalainlaing tanyag aron kombinsihong dili na motungha sa PDEA Leaks Senate hearing.
Pero, pinaagi sa ilang video call, madungog nga giklaro ni Enriquez, nga kon unsa man ang mensahe nga gustong ipaabot nila ngadto kang Sir Jonathan, maabot gyod kini.
Pero dili siya makapugos kon unsay makab-ot desisyon niini? Sayod si Enriquez nga adunay ligdong prinsipyo ug lig-ong baroganan sa kinabuhi si Sir Jonathan. Ug iya kining girespeto.
Gumikan niini, mabati sa pikas linya, nga mipahinumdom si Pikoy sa mga delikadong mahitabo ni Morales kon kini dili mosugot: “Alam mo si LAM…Padre, papatayin yan.
Baka, masagasaan yan. At kung ano ang mangyari dyan? Alam mo naman, baka sa sakit sa puso, mamatay yan. Maraming namamatay na tao na ngayon ay hindi na binabaril…”
Unya sa naghinapos nilang panagkukabildo, si Pikoy mihisgot: “Pero kagabi nagkausap pa kami ni James Kumar.”
Diin, dali rang nakasumpay-sukna si Enriquez: “Ibig mong sabihin na tumawag si LAM pala kay James?”
Naiknat kilay ni Senador Ronald ‘Bato’ dela Rosa pagkadungog sa pulong LAM.
Maisogong gisukna si Pikoy kon kinsa ba si LAM nga nahisgotan sa ilang panag-video call? Paspas pero nagkapusngapusngag miesplikar si Pikoy, nga sa YouTube kuno niya nakuha ang maong ngalan. Diin nakalitok pag ‘First Lady Liza.’
Hinuon, kathang-isip ra kuno kining tanan niyang gihimo ngadto kang Enriquez ug kunohay, nangayog pasaylo. Misamot kahayblad si Senador Bato, uy!
Apan makalbog. Klaro kaayong namakak si Pikoy labi na sa iyang pagyamyam og LAM. Ug nganong wala man kini ipa-cite in contempt?
Tungod ba kay “Evil men don’t understand justice. But those who seek the Lord understand it completely.”? (Proverb: 28:5). Aduna pa kahay Senador nga nangita-nakakita sa Ginoo?
- Latest
