Pambansang "Marites'

Walay nadawat si Presidente Marcos nga mga taho nga naglaraw ang mga aktibo’ng senior officers sa PNP sa pagpalagpot kaniya sa gahum sukwahi sa pasidaan ni kanhi senador Trillanes nga adunay nag-umido nga laraw sa destabilisasyon ang giumol karon sa mga opisyal sa kapolisan.  Dili angay isalikway ang mga huhungihong sa destabilisasyon, apan kon ang tinubdan niini mao ra usab si Trillanes, dili usab kini angayan hataga’g gibug-aton.  Daw bata nga kulang sa pagtagad kini si Trillanes.  Haum ang paghingalan kaniya sa ubang magbabalaod nga “Pambansang Marites”.  Fezteleern!

Wala maayo pagkatakgos

Mipasidaan ang China ngadto sa kagamhanan sa Pilipinas sa paghina-hinay sa laraw niini nga palagpoton ang mga Chinese diplomats dinhi kay ang bisan unsang dinali-dali nga aksyon mahimong makadaut sa Pilipinas.  Giluwatan ang maong pasidaan agi’g tubag sa China sa awhag sa DFA. Gibawsan man dayon ang pagpanggulat sa Pilipinas og mas labaw pa’ng golpe de gulat gikan sa China.  Kon dili kita magkahiusa sa pagbatok sa China, padayon gihapon ang yano nila nga pagpang-bully kanato.  Nahisama na lang kita sa silhig-tukog nga nakatag kay wala maayo pagkatakgos.  Madahaan!

Hilabti, di ba piti

Misugyot si Retired Supreme Court Justice Francis Jardeleza nga mosang-at og follow-up arbitration case ang Pilipinas aron pangayoan og damyos ang China sa mga kadaut nga nahimo niini diha sa atong EEZ.  Kon modaug kita, ipatuman kuno ang kamanduan didto sa ubang nasud diin adunay dagkong asset ang China.  Sama sa nahaunang desisyon sa arbitral court, sayon kini sultihon apan lisod buhaton.  Makapahinumdum sa duha ka nagduwa og baraha diin ang maldito nga player dako-dako na’g pildi busa buot na unta kambiyohan sa nakadaug ang tibuok nga usa ka gatos sa pildero.  Apan giingnan na man hinoon siya sa iyang maldito’ng kaduwa nga, “Hilabti na di ba mopiti ka”.  Pagkatoytoy!

Kuyog Apan dili kauban

Alang kang Cebu City Mayor Michael Rama politika ang motibo ni’ng grabe nga pag-guba ug pagdaot sa iyang imahe ngadto sa Malacanang human siya mapahamtangi og preventive suspension sa Ombudsman.  Mora’g natinuod ang giingon sa mayor nga “Sulod sa city hall, adunay mga kuyog apan dili kauban; ug aduna usa’y mga kauban nga dili kuyog”.  Sa madangog nga kalibutan sa politika, angayan magbantay kay ginaingon man nga “Ang asukal ug ang asin managsama ra baya ang hitsura”.  Muleeng!

Maanad ra ‘ta

Namahayag ang PAG-ASA nga ang El Nino weather phenomenon mahuman na sa bulan sa Hunyo apan mahimong mopuli usab dayon ang La Nina.  Wala pa gani kita makabangon sa kadaut sa El Nino, mobanos na usab ang La Nina nga magdala og daghan’g ulan ug laing matang sa kadaut.  Sa atong nasud, mora’g kabahin na ang maong mga weather phenomenon ug wala kitay mahimo gawas sa pag-adapt ug sa pagpangandam.  Haum sa atong kahimtang ang linya sa kanta ni Max Surban nga giulohan og “Opaw” nga nagkanayon, “Kana’ng imong ka-opaw ayaw la’g kabalaka, kay madugay maanad ka ra”.  Ateer!