Marcos niluwat og kamandoan sa pagdili sa wangwang

CEBU, Philippines — Si Presidente Ferdinand “Bongbong” Marcos, Jr. niluwat sa Administrative Order No. 18 nga nagdili sa mga opisyales ug personnel sa gobiyerno nga mogamit og wangwang, blinkers ug ubang signaling of lashing devices sugod karon.

Matud ni Police Lieutenant Colonel Roel Villarin, deputy regional chief sa Highway Patrol Unit-7 nga gumikan sa maong administrative order sa president eang mga politiko gikan sa kapitan hangtud sa kongresista dili na pwede magbutang og wangwang ug blinkers sa ilang mga service vehicle.

Gihangyo sila sa RHPU-7 nga boluntaryo nga manangtang sa accessories nga gipangbutang sa mga sakyanan aron dili madakpan tungod kay ilahang ipatuman ang maong kamandoan ni Marcos.  Sa nilabay’ng gabii nagpahigayon sila og operasyon diin pipila ka service vehicles sa mga barangay sa Siyudad sa Sugbo ang ilang gidakop. Giklaro ni Villarin nga ang pwede lang mogamit og blinkers ang sakyanan sa Armed Forces of the Philippines, Philippine National Police, National Bureau of Investigation, fire trucks sa Bureau of Fire Protection ug mga ambulansiya sa mga hospital.  Kadtong ambulansiya sa barangay ug Local Government Units pwedeng mogamit og blinkers ug wangwang basta nipasar sa specifications nga gipagawas sa DOH.

Ug kong dili makapasar pwedeng himuon kining Patient Transfer Vehicle nga gitugotan nga mabutangan og blinker ug wangwang.  Giklaro ni Villarin nga magamit lang ang wangwang ug blinker kong adunay kargang pasyente.

Gibutyag ni Villarin nga nakadawat sila og report nga adunay mga ambulansiya o transport vehicle nga bisan og walay karga nga pasyente nagsige og wangwang diin gidili kini.  Ug gumikan usab sa maong kamandoan gidili na usab ang motorcycle escorts ug aduna lay authorizes person nga pwede nga i-escort sama sa presidente, speaker of the house, senate president ug chief justice.

"Kanang mga local chief executives nato nga naa sila’y mga detailed personnel assign sa  local PNP nila ang mahitabo niana ang atong PNP motorcycle unit nila ma- assign na sila og HPG then kanang governor, mayor mag-request sila sa Chief PNP upon the approval doon sa threat assessment kong need talaga sila pabutangan og escort nga motorcycle ", pasabot  ni Villarin.

Dili usab basta-basta nga mag-assign og police isip escort tungod kay kinahan kining train sa HPG o VIP security. BDB BANAT NEWS