Mga JO wa gihapoy sweldo
Sa balita ning maong pamantalaan tulo na ka buwan nga wa makadawat sa ilang sweldo ang mga JO sa Cebu City government. Kini ang gikumpirmar nila ni Konsehal Noel Wenceslao, Chairman sa Budget and Finance Committee ug Konsehal Nestor Archival Sr., nga Minority Floor Leader.
Si Konsehal Wenceslao miingon nga aduna na'y budget nga gitagana sa sweldo alang 4,784 Ka mga regular, casual ug 3,357 ka mga JO employees sa city government.
Ang budget nalakip na sa annual budget sa 2024 nga mokabat og P25 billiones ka pesos. Samtang ang gratuity pay o Charter Day bonus nalakip sa Supplemental Budget (SB) 1 nga gi-approve niadtong Marso 8, 2024 atol sa usa ka special session.
Si Konsehal Wenceslao nagkanayon nga mopaubos ang executive department og proseso aron mahatag na ang sweldo ug incentives sa mga JO employees.
Dugang pa ni Wenceslao nga sigurado na nga madawat sa mga JO ang ilang sweldo sa mga milabay'ng buwan kung ma-renew na ang ilang appointment.
Apan alang sa mga di na ma-renew, di na sila makadawat sa ilang sweldo bisan pa man sa ilang natrabaho sa milabayng mga buwan.
Ang appointment sa mga JO ipaubos sa renewal matag tulo ka buwan sa unom sa buwan.Gipasabot ni Wenceslao nga nadugay ang proseso sa appointment sa mga JO tungod sa gipahigayon nga rightsizing kay laraw sa administrasyon nga minusan ang mga empleyado ngadto sa 3,000 sa tuig 2025.
Apan ang makadawat kadto lang mga na- appoint pero ang budget anaa na ug ang budgetary requirement. Ang problema kadto lang may appointment ang makadawat sa ilang suweldo, matud pa ni Wenceslao.
Sa usa ka interview, usa ka JO employee mikumpirmar nga tulo na siya ka buwan nga wa makadawat sa iyang sweldo apan di na kini bag-o niya tungod kay kanunay gyod nga malangay ang ilang suweldo nga moabot og tulo ngadto sa upat ka buwan.
Nganong kanunay man gyod nga malangay ang suweldo sa mga JO? May rightsizing man o wala dugay gyod nga madawat sa mga JO ang ilang suweldo. Wa gyod ni mahimo-i og solusyon sa mga malantip og huna-huna sa City Hall?
- Latest
