Ma-siyakoy si Quiboloy
Samtang nagkagamay ang iyang kalibotan, duna pay tulo ka kapilian si Apollo Quiboloy asa magpapriso liwas sa Semana Santa:
• Mahimo siyang mosurender sa Senate Committee on Women, Children, Family Relations and Gender Equality kansang pangu nga si Senador Risa Hontiveros nipasalig nga magtigom dayon aron pagpaminaw sa iyang testimoniya; o
• Mahimo sab siyang mosurender sa House of Representatives kansang Committee on Legislative Franchises duna pay dugang mga pangutana niya bisan giaprobahan na sa plenaryo ang pag-revoke sa prangkinsa sa iyang SMNI; o
• Maghuwat siya sa warrant of arrest sa korte.
* * *
Senado ang labing maayong kapilian kay daghan siyang higala:
• Si Senate President Migz Zubiri nga kuwang na lang og dyutay nga mangayo og pasaylo sa pagpirma sa arrest warrant batok niya;
• Si Senador Robin Padilla nga niila niyang bayani human gilibre sa airtime sa SMNI ug gipagamit sa iyang chopper;
• Si Senador Bato dela Rosa kinsa nitanyag nga iyang bodyguard;
• Senador Imee Marcos kinsa nasubo sa gidangatan ni Quiboloy sa way pagsusi sa kahimtang sa mga nangangkon nga iyang biktima; ug
• Senador Cynthia Villar kinsa niingon nga buotan siya sa ilang pamilya bisan gipasanginlang nanglugos og mga bata.
* * *
Sama sa Senado aircon ang kuwarto nga giandam sa House para niya. Dunay pansayan. Makagamit og cellphone ug internet. Libre ang pagkaon ug makadawat sa paboritong mga putahe gikan sa iyang mga bisita.
Pero mayoriya sa mga kongresista lain og tinan-awan niya. Wa silay labot kinsay uban niyang gihilabtan. Kinadak-ang atraso ang pagpasangil nga nigasto si House Speaker Martin Romualdez og P1.8 bilyones para sa mga laag.
* * *
Kon molampos si Quiboloy sa pagtago gikan sa House ug Senado, salamat sa kakuwang og interes sa kapolisan sa Davao pagsusi sa iyang gitagoan, mahimong malutsan og sugo sa korte pagbalhog niya sa tinuod nga prisohan. Kay usa sa iyang kaso di man kapiyansahan, mameligrong matanggong samtang magkamang ang husay.
Kon mahitabo, mas maayong mangaliya nang daan nga pulos iyang mga sakop sa mga guwardiya ug ubang mga piniriso aron kahatagan siya og special treatment sa nangalisbo ug nag-awas nga mga selda. Hinaot nga di mataligam-an ang sulti sa katiguwangan: “Sa tantong likay sa kayo, matugpa sa baga.” [email protected]
- Latest
