Asa diay si Cutie

Gibisita sa mga bagong opisyal sa Barangay Councilors League of the Philippines (BCLP), Cebu City Chapter ang ubos Balay Balauranan niadtong Pebrero 6, 7 ug 8 alang sa mga mahinungdanon nga tuyo sa mga magbabalaud sa Pilipinas nga mao ang mga kongresista ug senador.

Sa among pagbisita sa ubos Balay Balauranan, mapasalamaton kaayo kami sa liderato ni House Speaker Ferdinand Martin G. Romualdez nga miakomodar gayod kanamo. Gani gisuspenso pa og lima ka minutos ang ilang session aron ipaila ug ipahibalo ang among pagbisita.

Miasikaso sa among pagbisita si Kongresista Edu Rama sa South District sa dakbayan sa Sugbo ug si Kongresista Mendoza.

Bisan og gipahibawo wala gyod magpakita sa mga opisyal sa BCLP ang kongresista sa norte distrito nga si Cutie Del Mar. Ang nagpakita lang kanamo mao ra ang basiyo sa tubig nga iyang giinom nga nakapatong sa iyang table.

Ngano kaha nga wala magpakita sa mga opisyal sa BCLP si Kongresista Cutie Del Mar nga unta kasagaran man kanila gikan sa iyang distrito. Nahadlok ba ang kongresista nga makakuot sa iyang bulsa aron iyang ipakaon sa iyang mga bisita? Kun mao man ugaling kini ang iyang gikahadlokan, dili gyod siya mahadlok niini kay nagbawon pod intawon ang mga opisyal sa BCLP. Gawas pa, nagbaha ang tanyag nga pagkaon sa mga kongresista ug senador nga miabi-abi sa ilang mga bisita. Presensiya lang ni Cutie Del Mar ang gikinahanglan.

Sa laing bahin, gipahibawo ni Senador Allan Peter Cayetano nga nagpadayon ang iyang mga programa nga dako na og gikatabang sa katawhan nga nanginahanglan sama sa tabang medikal ug panginabuhi.

Samtang milutaw ang pagkabisaya ni Senate President Migz Zubiri nga miatiman sa mga opisyal sa BCLP nga mga Bisaya. Mikanaug siya sa makadiyot isip Senate President kay mipadangat sa iyang mensahi isip co-sponsor sa balaudnon nga gipalabang nga magdugang og usa ka gatos ka pesos nga umento sa suholan sa mga anak sa singot sa pribadong kompanya. Good job, mga senador.