EDITORYAL - Pagkompleto sa CCMC

Daghan nang mga Sugbuanon ang naghinamhinam nga mahuman na gyud kining Cebu City Medical Center nga dugay kaayong nakompleto.

Gipaningkamutan sa siyudad nga sa dili pa ang Charter Day sa bulan sa Pebrero sa sunod tuig mahuman na kini nga proyekto. Ang CCMC naanam lang ang paghuman tungod sa mga kakulian gikan sa mga kontraktor, budget ug ang politika.

Niadtong nakalabay nga tuig sa bulan sa Nobiyembre, si Mayor Michael Rama mi-terminate sa kontrata niini sa usa sa mga kontraktor tungod sa matud pa kalangay sa paghuman sa proyekto.

Usa kini sa rason kung nganong wala pa hangtud mahitabo ang full operation sa maong tambalanan. Kaning napulo ka andanang edipisyo gipaninguha sa dakbayan nga mahuman karong sunod tuig.

Kun kahinumdoman, si Rama nilarga sa nagkalain-laing nasud ug mihangyo sa mga pribadong sektor nga tabangan ang CCMC sa gikinahanglan niini aron makompleto.

Dili pa man tuod kompleto ang pasilidad, apan daghan na kining naserbisyohan bisan sa limitadong mga serbisyo gikan sa out-patient ngadto na sa mga surgical operation.

Basin pa diay, sa umaabot nga mga panahon, duna na unyay kaugalingong heart transplant o kidney transplant sa CCMC, daghang mga kabus nga taga Cebu City nga makabenepisyo.

Apan ang labing maayo gyud unta kun ang CCMC mabutangan og mga bag-ong modernong kagamitan sama sa tanang laboratoryo, CT scan ug MRI ug ingon man dialysis center nga gamit kaayo sa mga pasyente ug usa sa mga doktor. Sagad sa CT Scan ug MRI adto himuon sa mga pribadong klinika o pribadong mga tambalanan nga pwerteng mahala.

Gawas pa, kana untang mga kasagarang gamitonon sa pasyente, naa gyud unta kanunay stocks inay nga ang tagtungod pay magdiin-diin pagpangita niini sa mga botika diha sa gawas sa CCMC.

Luoy kaayo ang mga pobre kay madiin-diin sila pangutang aron mapaubos sa maong eksaminasyon ilang pasyente. Duna man tinuod City Hospitalization Assistance and Medicine Program (CHAMP) sa siyudad, apan kuwangon gihapon kay daghan pang palitonon nga dili covered niini.

Ang Cebu City usa sa mga labing adunahan ug labing sikat nga siyudad dinhi sa Pilipinas, kinahanglan nga naa sab kini de primera klaseng pangpublikong tambalanan.