EDITORYAL - 13th month pay ug bonus

Naghinam-hinam na og maayo ang tanan ilabi na kadtong mga dunay trabaho nga madawat ang ilang 13th month pay para adunay magamit sa Pasko.

Apan subo lang nga dunay mga nanarbaho sab nga wala pa hangtud karon makadawat sa ilang benepisyo ug ang uban wala gyuy mapaabot gikan sa ilang mga gitrabahoang kompanya.

Subay sa Labor Code sa Pilipinas, ang employers gikinahanglan gyud mohatag og 13th month pay sa ilang mga regular nga empleyado sa dili pa amg Disyembre 24, praktikal kaayo ang balaod  kay gitan-aw niini nga adunay magamit ang empleyado para sa Pasko. Ang 13th month pay mao ang suma total sa “basic salary”sa empleyado matag buwan bahinon kini kun pila ka buwan na kining nagtrabaho anang tuiga. Panangltan, usa ka tuig ng nagtrabaho, tipunon ang tanang nadawat nga basic salary kada buwan dayon bahin sa 12 ka buwan.

Kun ang kawani nag-sweldo og P10 mil kada buwan, nagpasabot kini nga P10 mil x 12 (buwan) = P120 dayon bahin og ka 12 (buwan) ang resulta P10 mil ang 13th month pay.  Bisan ang contractual nga empleyado makadawat gihapon og 13th month pay basta sila sinuweldohan og inadlaw o bisan unsang matang sa sistema sa paghatag sa ilang sweldo , bisan usa palang sila ka bulan, sumala pa sa balaod.

Apan ang mga empleyado sa gobiyerno, mga katabang o kadtong ang trabaho base sa komisyon, dili obligado ang agalon nga mohatag og 13th month pay.

Sa mga empleyado sa gobiyerno dunay gitawag nga Christmas bonus nga kinahanglang suportado og resolusyon sa Konseho, Kongreso o balaod.

Samtang sa mga nagbase lang sa komisyon o sa mga katabang sa balay, magdepende na kini sa kamaayo sa ilang trabaho nga kahimut-an sa ilang mga agalon. Sagad niini, bonus ang tawag sa pahalipay.

Sa mga maayong kompanya, gawas sa 13th month pay, duna sad silay Christmas Bonus depende sa gidak-on ug performance sa mga kawani.

Tan-awon unta sa mga magpapatigayon ang kadako sa natampo sa ilang mga empleyado bisan unsa pay posisyon. Bisan gani ang janitor dako og papel sa kalamposan sa ilang kompanya ug operasyon ug angayan sab sila hatagan og kalipay karong kapaskohan.