EDITORYAL - Alagwa na ang reclamation projects
Binigyan na ng clearance ang Pasay City Eco-City Coastal Development para maipagpatuloy ang kanilang reclamation projects sa Manila Bay. Ang pagbibigay ng clearance ay maaring maging dahilan para ipaggiitan din ng iba pang kompanya ang pagsasagawa ng kanilang reclamation. At kung mangyayari ito, balewala ang kautusan ni Presidente Ferdinand Marcos Jr. noong Agosto 7, 2023 na nagpapahinto sa lahat ng reclamation projects sa buong bansa. Dalawampu’t dalawang reclamation projects ang ipinatigil ni Marcos. Hindi umano maganda ang pamamahala at operasyon ng mga ito kaya niya ipinahinto.
Pero nagbago ang ihip ng hangin at meron nang makakapagsasagawa ng reclamation, apat na buwan makaraang ipag-utos na itigil ang reclamation projects. Anong nangyari? Ipinaliwanag naman ng Department of Environment and Natural Resources (DENR) at Philippine Reclamation Authority (PRA) na nakakuha ang Eco-City ng environmental compliance certificate (ECC) kaya naaprubahan. Dalawa ang reclamation projects ng Eco-City sa Manila Bay—ang “Pasay 265” at “Pasay 360”.
Tiyak nang aalagwa ang reclamation projects hindi lamang sa Manila Bay kundi sa marami pang bahagi ng bansa dahil sa pagbibigay ng permiso sa Eco-City. Wala namang lakas o “ngipin” ang DENR para mapigilan ang mga kompanya. Isa pa rin sa dahilan ay wala namang inilabas na Executive Order si Marcos Jr. Kung nag-isyu ng EO tiyak na may kapangyarihan ang kautusan. Dahil sa salita lang niya idinaan ang pag-uutos sa suspension ng reclamation projects, madaling balewalain.
Tiyak ding magpapatuloy ang mga isinasagawang seabed quarrying sa dalampasigan ng Cavite. Ang dredging operations sa nasabing probinsiya ang dahilan para maapektuhan ang pinagkukunan ng ikinabubuhay ng mga mangingisda. Sabi ng Pambansang Lakas ng Kilusang Mamamalakaya ng Pilipinas (Pamalakaya) marami silang nakitang dredging vessels sa Rosario, Noveleta, Tanza at Naic na nagpapatunay na ang kautusan sa pagpapatigil sa reclamation projects ay walang katotohanan. Ang patuloy na dredging operations ay nakaaapekto sa kabuhayan ng mga mangingisda na umaasa sa Manila Bay.
Mayroon ding reclamation projects sa Isla Verde sa Batangas kung saan ginagawa ang liquefied natural gas terminals at power plants doon. Sa Isla Verde matatagpuan ang mayayamang coral reefs. seagrasses at marine fauna. Ang Verde Island Passage ay kilala sa mundo dahil sentro ng global shore-fish biodiversity.
Magkaroon sana ng ngipin ang DENR at magpakita ng tapang sa mga kompanyang nagsasagawa ng reclamation na nakaaapekto sa kabuhayan ng mga mangingisda at sumisira sa kalikasan. Ito rin ang itinuturong dahilan nang malawakang baha sa Metro Manila at karatig probinsiya.
- Latest