Anti-sexual harassment

Daghan kanato ang wa pa kaayo masayod sa balaod nga gihimo atol sa administrasyon ni kanhi Presidente Duterte, ang Republic Act 11313, sa minubo pa “Safe Spaces Act.”

Balaod kini nga mopahamtang og silot niadtong makahimo og gender-based sexual harassment sa mga trabahoan, sa online, sa karsada ug labaw na sa mga tunghaan.

Gibasa nako ang maong balaod, ug nakapanglingo-lingo ko kay bisan ang pagpanaghoy ngadto sa usa ka babaye, mahimo ka na nga ireklamo, labaw na og manghikap.

Bisan gani diay ang pagsige’g pangutana sa nga’n, kon asa nagpuyo ang babaye, o lalaki, mamugos pagpangayo’g contact numbers, mahimo ka na nga ireklamo.

Gibutang sa balaod nga ang mga tagdumala sa mga trabahoan, tunghaan, ug uban pa nga balay patigayon, angay’ng mohimo og lakang aron malikayan ang pagpangabuso.

Sagad gyud ni nga mahitabo sa mga tunghaan. Aw sumala gud, dunay maestro nga gipasanginlan nga nagmolestiya sa iyang mga estudyante.

Dinhi sa Cebu City, dunay tunghaan nga mihimo gyud og lakang aron makatuman sila sa gilatid sa Safe Spaces Act, ug aron luwas ang ilang mga tinun-an sa sexual abuse.

Gidayeg nako ang mga tagdumala sa iACADEMY nga anaa magbase sa building nga gitukod sa nahimutangan sa karaang BBRC sa W. Geonzon Street, duol sa IT Park.

Pinaagi sa ilang website, akong nabasa nga nagpahigayon sila og ceremonial signing sa Pledge of Commitment nga tumanon nila ang balaod sa Safe Spaces Act, ilabi na diha sa ilang tunghaan.

Ang una nilang gihimo, gitudloan nila ang ilang mga tinun-an kon unsay mga gidili sa balaod, ug gidasig ang mga estudyante nga ireport kon dunay mohimo og kalapasan.

Ang namirma sa Pledge of Commitment mao ang mga tinun-an, mga magtutudlo ug mga school staff sa iACADEMY. Maayong sundon kini sa ubang mga tunghaan sa Cebu City.

Karon pa ko makadungog niining maong tunghaan dinhi sa Cebu, ug nahibaw-an nako nga branch-school diay ni sa usa ka iladong tunghaan sa Manila.

Nindot kaayo ang ilang kawsa kay gusto sa tagdumala sa tunghaan nga ilikay ang ilang mga tinun-an, dili ra kay mga babaye, gikan sa lainlaing matang sa gender-based sexual harassment.

Ilang gipasabot nga ang pagpanaghoy ngadto sa usa ka babaye dili kini maisip nga usa ka pagdayeg, kondili usa kini ka pagbugalbugal.

Daghan sila og gihimong mga slogan, sama sa No means No; Be a hero not a bully; Stop victim blaming; Unconcious is not consent; Bawal Bastos ug daghan pa.

Kon mao ni, safe kaayo ang moeskwela diha sa ilang tunghaan. Kamong ubang tagdumala og tunghaan, lihok dayon ug sunda ang iACADEMY.