Daghang kontra sa nasud
Kon paundayonan ang sulti ni Bise Presidente Sara Duterte Carpio nga ang mga nisupak sa confidential funds kontra sa kalinaw ug sa nasud, mahimong isipon nga mga kriminal ang mosunod:
·Mayoriya sa mga kongresista nga nibalhin sa P650 milyones nga confidential funds (P500M sa Office of the Vice President ug P150M sa Department of Education) ngadto sa security agencies;
·Mayoriya sa mga senador nga nidason sa mga kongresista; ug
·Mayoriya sa respondents sa nasudnong surveys nga nihangop sa paglaslas sa confidential ug intelligence funds sa sibilyang mga ahensiya sa gobiyerno.
* * *
Human naklaro ni Carpio nga di matarug ang mga kongresista bisan sa mga insulto ug hudlat sa iyang amahan sa pag-audit nilang tanan, nga pipila ra sa ilang alyado nga mga senador ang mobarug sa pagpahibilin sa iyang confidential funds ug nga di magtagad si Presidente Ferdinand Marcos Jr. sa pagpanalipod sa iyang panginahanglan sa dugang kuwarta, nipahibawo siya nga di na lang mangayo og confidential funds sa 2024.
Sa ato pa, maunay si Carpio sa iyang sulti: Kapasanginlan sab siya nga kontra sa kalinaw ug sa nasud.
* * *
Sa iyang opisyal nga pamahayag sa pagsurender sa confidential funds, si Carpio nipasabot nga nangayo unta siya sa budget para sa mga proyekto sa paghaw-as sa katawhan gikan sa kakabos. Lahi ang pagpasabot ni kanhi Presidente Rodrigo Duterte nga ang intelligence (di confidential) funds nga gipangayo sa iyang anak para sa pagbanhaw sa mandatory nga Reserve Officers’ Training Corps (ROTC) program sa tanang estudyante sa kolehiyo.
Tungod sa sukwahi nga panglantaw, ang amahan maigo sa sulti sa anak: Kapasanginlan sab nga kontra sa kalinaw ug sa nasud.
* * *
Nidugang pagpasabot si Carpio nga di na siya mangayo og confidential funds kay ang isyu nakapabuak-buak sa nasud, sukwahi sa iyang gipanumpaan isip bise presidente sa pagpabilin sa nasud nga malinawon ug lig-on. Pero ang iyang amahan ug trolls nagsige pa og pasangil nga ang mga kongresista duna say confidential funds nga gitawag og MOOE (maintenance and other operating expenses).
Kon tuohan ang bag-ong sulti ni Carpio, dunay namugna nga bag-ong krimen: Ang confidential funds ug MOOE kapasanginlan na sab nga kontra sa kalinaw ug sa nasud.
* * *
- Latest
