Huna-huna ug kasing-kasing

Namahayag si Bise Presdente ug Education Secretary Sara Duterte nga ang de-kalidad nga edukasyon dako’g ikatampo sa pag-umol sa maayong kaugmaon sa kabataan ug pundasyon sa pagpalambo sa human capital nga maoy labing dakong bahandi sa atong nasud.  Tinuod nga ang edukasyon maoy labing gamhanan nga armas nga makapa-usab sa kaugmaon sa nasud ug sa kalibotan.  Apan kinahanglan nga ang edukasyon bug-os ug hingpit kay ginaingon man nga “Dili hingpit ang edukasyon kon ang hunahuna lang sa bata ang gi-edukar, apan wala ang iyang kasing-kasing.” Muleeng!

Work from home

Gitugotan ni Presidente Marcos ang work from home (WFH) arrangement alang sa mga empleyado sa gobiyerno karong Oktobre 31 aron paghatag kahigayonan nga masaulog sa hingpit ang Adlaw sa mga Santos sa Nobyembre 1.  Mora’g gipagawas nga aduna gihapo’y trabaho sa maong adlaw aron ba kaha dili kini mosukwahi sa unang pamahayag nga dili holiday ang maong petsa.  Apan ang lintunganay, sama ra og gideklarar nga holiday ang Oktobre 31.  Wala gihapo’y nada ang maong WFH arrangement kay matud pa sa akong higala, “Dili man gani motrabaho bisan naa nitambong sa opisina, “mag-work from home” pa kaha.”  Fezteleern!

Maligsan o madakpan

Nanawagan si Presidente Marcos sa mga kagamhana’ng lokal nga maningkamot sila nga makakat-on sa mga labing maayong pamaagi (best practices) sa laing nasud aron sa ingon, mapalambo nila ang pagpangalagad sa katawhan.  Dili lang unta sabton nga ang panawagan sa Presidente, lisensya na nga magtugot sa mga lokal nga opisyales sa mga “junket travels.”  Kon suroy-suroy ra ang katuyoan, maayo pa magpuyo kay nag-usik-usik lang sa pundo sa kagamhanan.  Matud pa sa akong amigo nga nahingawa, “Basin gabaan mo sa inyong pagsuroy-suroy sa laing nasud, maligsan unya mo didto sa pison o ba kaha madakpan mo’g curfew.” Simbakoo!

_{Maayo pa ang koyme}

Nanawagan ang mayoriya sa UN General Assembly sa usa ka hinanali nga “humanitarian truce” sa Gaza luyo ni’ng nagpadayon nga giyera tali sa Israel ug Hamas.  Apan gisaway sa Israel ang maong “non-binding resolution” kinsa mipadayag usab nga padayon nilang pakigbatukan ang mga Hamas. Daw walay pulos ang panawagan/resolusyon sa UN General Assembly kay wala man kini tamda sa mga hingtungdan.  Panahom pa sa uban, “Mas maayo pa ang koyme sa buwangan kay sa UN General Assembly, kay makabuot pa siya kon pahunongon ba ang sultada ug makadesider usab kon kinsang manok ang padag-on.”  Pagkatoytoy!

Maihap ang boto

Gipasidan-an na usab sa COMELEC ang mga kandidato sa BSK Elections nga ang paghatag og “libreng sakay” sa mga botante sa adlaw sa piniliay usa ka matang sa vote-buying.  Gidasig man kaha sa COMELEC ang katawhan nga mobotar busa dili na lang unta kini daginoton.  Hinonoa, mo-focus lang unta ang ahensya nga mapahigayon ang hapsay nga piniliay.  Kay ginaingon baya nga, “Ang atong demokrasya nagasukad sa konsepto nga matag lumolupyo may katungod mobotar, ug nga ang ilang boto maihap gayod sa saktong pagka-ihap.” May lain pa!