Sakpan gyud’

Daghang dapit dinhi sa Dakbayan sa Sugbo nga gibisitahan nako kaniadtong Domingo ug gikuhaan og video footage ang mga aseras nga gigamit na sa personal kay gihimo na kini nga sulod sa panimalay, o building.

Ang aseras gitagana gyud alang sa publiko aron anha sila moagi ug dili kay anha molakaw sa karsada. Giadto nako ang pipila ka karsada sa Sikatuna Street ug Bonifacio Street nga sakop sa Barangay Parian.

Dayon, miadto ko sa Taboan District sa Barangay San Nicolas Proper ug sa Barangay Pahina San Nicolas. Gisusi nako ug nasuta gyud nga ang lapad nga aseras sa Lakandula Street, B. Aranas Street, ug pipila ka laing mga karsada nahanaw na.

Misu’d ko sa usa ka tindahan sa Lakandula Street ug nagpatoo nga mopalit ko’g silhig, apan ang tuyo gyud nako aron hinabion ang usa ka edaran na nga lalaki.

 Tuod, wa ko masayop kay ang mao nga tinderong lalaki miangkon nga 40 ka tuig na siyang nagpuyo diha sa Taboan, ug mitug-an nga ang tindahan niya, anaa mahimutang sa aseras kaniadto.

Nag-abang ra hinuon ang maong lalaki sa balay nga gipalapad na ug gisakop na ang karaang aseras sa Lakandula Street.

Aw, kon ang mga tinugyanan sa City Hall, ilabi na ang mga kawani sa Prevention Restoration Order and Beautification Enhancement (PROBE) Team mosusi sa maong dapit, makita gyud nila nga ang kabalayan diha miabot na sa gutter sa karsada.

Gani, ang lagwerta sa balay nga giabangan sa lalaking tindero, gitinguha pa gyud nga isaylo lapas sa gutter kay gisemento na man.

Ang pag-aspalto gud sa Lakandula Street gisimang na lang ug wa taboni ang semento, kay maikog tingali sila. Unya, kon kaniadto kawayan ra ang kural gikan sa gutter, karon sin na gyud ang gigamit, ug ang uban kahoy.

Tungod kay gigamit na man nila ang aseras nga alang unta sa publiko, ang mga tawo anha na tawon maglakaw sa karsada.

Gikan sa eskina Tres de Abril Street paingon sa eskina B. Aranas Street, pwerteng grabeha sa pangabuso. Unya, ang nagpuyo sab sa B. Aranas Street, aw wa sab magpabentaha kay giukopar sab nila ang aseras.

Ang atbang nga bahin sa eskina Lakandula ug B. Aranas, kaniadtong mga 1970, botika pa kini nga gipanag-iya sa pamilyang Murillo.

Lapad kaayo ang aseras sa Botica Saint Mary ug kining inyong higala nakapuyo gani diha kaniadto kay apohan man nako ang tag-iya.

Kini maoy rason nga suheto kaayo ko kon unsa kalapad ang mga aseras sa Taboan District kaniadto. Unta, subay sa tinguha ni Mayor Michael Rama nga ibalik ang mga public places ngadto sa publiko, lihokon unta kini sa mga hingtungdang opisyal.